Qazaqstanda Qyzyl Krest Komıtetiniń keńsesi ashylady
ASTANA. QazAqparat - Parlament Májilisiniń jalpy otyrysynda «QR Úkimeti men Halyqaralyq Qyzyl Krest Komıtetiniń arasyndaǵy Qazaqstan Respýblıkasyndaǵy Halyqaralyq Qyzyl Krest Komıteti Ókildiginiń mártebesi, artyqshylyqtary jáne ımmýnıtetteri týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat.
Tıisti kelisimge 2011 jylǵy aqpanda Astanada qol qoıylǵan bolatyn.
«Osy Komıtet táýelsiz ári beıtarap uıym bolyp tabylady. Ol qarýly qaqtyǵystar men zorlyq-zombylyqtyń basqa jaǵdaılarynan zardap shekken adamdardy qorǵaýǵa, tótenshe jaǵdaılardyń qurbandaryna kómek kórsetýge, sondaı-aq gýmanıtarlyq quqyq pen qaǵıdattardy damytýǵa óziniń jumysyn baǵyttaǵan», - dedi Syrtqy ister mınıstri Qaırat Ábdirahmanov.
Belgili bolǵandaı, Halyqaralyq Qyzyl Krest Komıteti Qyzyl Krest pen Qyzyl Jarty Aı halyqaralyq qozǵalysynyń quramdas bóligi. Sonymen qatar, onyń quramyna ulttyq qoǵamdar, sonyń ishinde Qazaqstandaǵy Qyzyl Jarty Aı qoǵamy, Qyzyl Krest jáne Qyzyl Jarty Aı qoǵamynyń halyqaralyq federatsııasy kiredi.
«Qarýly jáne gýmanıtarlyq qaqtyǵys jaǵdaıynda Komıtet qozǵalystyń kómek kórsetý jónindegi halyqaralyq qyzmetin úılestiredi ári basqarady. Uıym soǵys qurbandaryn qorǵaý týraly Jeneva konventsııasynyń jáne oǵan qosymsha hattamalardyń negizinde jumys isteıdi. Atalǵan qujattar zorlyq qurbandaryn qorǵaýǵa baǵyttaǵan uıymnyń mindetteri men erekshe mandattaryn aıqyndaıdy. Bul mandatty álemniń barlyq memleketteri moıyndaıdy. Qazaqstan joǵaryda atalǵan barlyq konventsııalar men hattamalarǵa qosyldy. Komıtetpen jumys - ol Qazaqstannyń halyqaralyq yntymaqtastyǵynyń mańyzdy bóligi», - dedi mınıstr.
Onyń sózine qaraǵanda, jobany qabyldaý - Qazaqstandaǵy osy Komıtettiń keńsesin ashýǵa jáne onyń qyzmetin barynsha az shyǵyndarmen jáne kómekke muqtaj adamdarǵa tikeleı paıdasyn barynsha arttyra otyryp, júzege asyrýǵa járdemdesedi.
«Bastapqy kezeńde atalǵan komıtettiń keńsesinde 3 qyzmetker bolady dep kózdelgen. Olar Qazaqstan azamattary bolady. Bolashaqta osy komıtettiń jobalarynyń sany artsa, jumys kólemi men mazmuny artsa, onyń qatarynda isteıtin azamattardyń sany 5-ke deıin kóterilýi múmkin. Sondaı-aq komıtettiń basshysy retinde halyqaralyq deńgeıde konkýrs arqyly shetel azamattary kelýi yqtımal», - dedi vedomstvo basshysy.
