Qazaqstanda «Qyzyl kitapqa» engen janýarlardyń qonys aýdarýyn zertteıtin ortalyq qurylady
ASTANA. 14 qyrkúıek. QazAqparat - «Ańshylyq-zooónerkásip» ónidiristik birlestiginde jabaıy janýarlardyń qonys aýdarý ortalyǵyn qurý qajet.
Bul týraly búgin QR Aýyl sharashylyǵy mınıstrliginiń alqa májilisinde vedomstvoǵa qarasty Orman jáne ańshylyq sharýashylyǵy komıtetiniń tóraǵasy Erlan Nysanbaev málim etti.
Onyń atap ótýinshe, 2005 jyldan bastap qulan, qaraquıryq, buǵy, arqar syndy «Qyzyl kitapqa» engen janýarlardy jańa jerlerge kóshirý jumystary qolǵa alynǵan. Bul jumystar memlekettik satyp alýlar konkýrsyn jeńip alǵan túrli uıymdarmen júrgizilgen. «Qazirgi ýaqytta qulandar men qaraquıryqtardy «Altynemel» ulttyq parki aýmaǵynan basqa jaqqa kóshirý máselesi ótkir bolyp otyr. Óıtkeni bul aımaqta olardyń sany kóbeıip ketti», - dedi ol.
Sonymen qatar E.Nysanbaev: Jersindirý jáne qaıta jersindirý boıynsha júıeli jumystardy uıymdastyrý úshin «Ańshylyq-zooónerkásipti» qajetti tehnıkalarmen, qural-jabdyqtarmen jáne bilikti mamandarmen jabdyqtap, jabaıy janýarlardy qonys aýdarý ortalyǵyn qurý qajet», - dep atap ótip, mundaı ortalyqtyń jobasy ázirlengendigin, biraq onyń qurylysyna qajetti qarjy bólinbegendigin eskertti.
«Bul maqsattardy qarjylandyrý qoldaý tapqan joq. Atalǵan usynys 2014 jylǵa arnalǵan respýblıkalyq bıýdjet jobasyna engizildi», - dedi ol.
