Qazaqstanda qyzmetkerdiń jumys isteýine qolaıly jaǵdaı jasaýdy kózdeıtin úsh jaqty kelisimge qol qoıyldy

NUR-SULTAN. QazAqparat - QR Premer-Mınıstriniń orynbasary Eraly Toǵjanovtyń tóraǵalyǵymen áleýmettik áriptestik pen áleýmettik jáne eńbek qatynastaryn retteý jónindegi respýblıkalyq úshjaqty komıssııanyń otyrysy ótti, dep habarlaıdy QazAqparat primeminister.kz-ge silteme jasap.

Otyrysqa Qazaqstan Kásipodaqtar federatsııasy men jumys berýshiler birlestikteriniń ókilderi, sondaı-aq ortalyq jáne jergilikti memlekettik organdardyń basshylary qatysty.

Eńbek jáne halyqty áleýmettik qorǵaý mınıstri men óńir ákimderiniń orynbasarlary osy baǵyttaǵy atqarylyp jatqan sharalar boıynsha esep berdi.

Otyrys barysynda vıtse-premer pandemııa kezinde eń aldymen jumys oryndarynyń saqtalýy, jalaqynyń ýaqytyly tólenýin qamtamasyz etý máselelerine basymdyq berilip otyrǵanyn atap ótti. Osy oraıda Eraly Toǵjanov jumys berýshiler men qyzmetkerlerdiń múddelerin qorǵaıtyn kásipodaqtardyń baǵa jetpes úlesin atap ótti.

Qorytyndylaı kele E. Toǵjanov ortalyq memlekettik jáne jergilikti atqarýshy organdarǵa birqatar tapsyrma berdi, atap aıtsaq:

shtattardy jáne eńbekaqy tóleý sharttaryn ońtaılandyrý boıynsha Qazaqstannyń jumys berýshileri iske asyratyn sharalarǵa keshendi taldaý jasaý; eńbekaqy tóleýdiń biryńǵaı standarttaryn engizý máselesin pysyqtaý; salalyq úshjaqty komıssııalardyń jumysyn jandandyrý.

Budan bólek, otyrys aıasynda Qazaqstan Úkimeti, jumys berýshilerdiń respýblıkalyq birlestikteri men kásipodaqtardyń respýblıkalyq birlestikteri arasynda 2021-2023 jyldarǵa arnalǵan bas kelisimge qol qoıyldy. Jańa kelisimde qoıylǵan mindetter qyzmetkerlerdiń jumys isteýine qolaıly jaǵdaı jasap, qaýipsizdigin qamtamasyz etýdi kózdeıdi.