Qazaqstanda qyzdar men uldarǵa jıi qoıylatyn esimder belgili boldy

ASTANA. QazAqparat - Úkimette  ótken baspasóz máslıhatynda QR Ulttyq ekonomıka birinshi vıtse-mınıstri Rýslan Dálenov elimizde qyzdar men uldarǵa jıi qoıylatyn esimderdi atady, dep habarlaıdy QazAqparat.

«Bala týý kórsetkishi Mańǵystaý oblysynda eń joǵary. Bul óńirde myń turǵynǵa shaqqanda 31 adamnan keledi. Al týý kórsetkishiniń eń tómen deńgeıi Soltústik Qazaqstan oblysynda baıqalady.  Oblysta myń turǵynǵa shaqqanda 14 adam»,-  dedi birinshi vıtse-mınıstr.

Onyń dereginshe, 2016 jyly 400 myń sábı dúnıege kelse, onyń 207 myńy ul, 193 myńy qyz bala.

«Er balalar jıi ómirge keledi. 2017 jyldyń sáýiri men ótken aıda 29 myń sábı dúnıege keldi. Onyń 15 myń ul, 14 myńǵa jýyǵy qyz bala. 2017 jyldyń sáýirinde qyzdar arasyndaǵy eń tanymal esimder qatarynda Aızere degen at boldy.  Bul esim 437 qyzǵa berilgen. Odan keıin Aıarý 398 balaǵa berildi. Raıana esimi de tanymal bolyp keledi. Ánshiniń qurmetine  oraı berilip jatqan shyǵar. Bul esimdi 319 qyz ıelendi. Uldar arasynda 279 balaǵa  Álıhan, 260 balaǵa Aısultan jáne 217 balaǵa Nurıslam esimderi berilgen», - dedi Dálenov.