Qazaqstanda qytaıdyń balyq aýlaryn satýǵa tyıym salý kerek - Eleýsizov
ASTANA. QazAqparat - Qazaqstanda qytaıdyń balyq aýlaryn satýǵa tyıym salý kerek. Bul týraly búgin «Tabıǵat» ekologııalyq odaǵynyń basshysy Mels Eleýsizov málim etti, dep habarlaıdy QazAqparat.
«Qytaıdyń kóp taralǵan balyq aýlaryna toqtalmaqpyn. Balqashta, Qapshaǵaı sý qoımasynda jyl saıyn bolamyn jáne biz tazalaý jumystaryn júrgizemiz. Sonda sý túbi atalǵan aýlardan kórinbeıdi. Soǵan balyqtar oralyp qalyp, qyrylyp jatyr», - dedi ol.
Osy rette Eleýsizov atalǵan aýlarda paıdalanýǵa, sonymen birge satýǵa tyıym salý bastamasyn kóterdi.
«Bul aýlar kontrabandalyq jolmen kelip, barlyq balyqshylar ony satyp alady. Sondyqtan ony satýǵa múldem tyıym salǵan jón. Balqash zardap shegýde. Jalpy, bul aýlar barlyq balyq sharýashylyǵy úshin tragedııa bolyp otyr. Sol sebepti tez arada shekteý engizý jáne ony satýshylardyń barlyǵyn ustaý qajet», - dedi ekologııalyq odaq basshysy.
Aıta keteıik, Májilistiń Agrarlyq máseleler komıtetinde elimizdegi balyq sharýashylyǵynyń jaǵdaıy jáne damý máseleleri talqylandy. Otyrysta QR Aýyl sharýashylyǵy vıtse-mınıstri Erlan Nysanbaev taıaý aralyqta balyq sharýashylyǵyn damytý Úkimet otyrysynda qaralatyndyǵyn málimdedi.
