Qazaqstanda Qytaıdyń aldyńǵy qatarly agrotehnologııasyn kórsetetin alań ashylady
ASTANA. QazAqparat - Qazaqstanda Qytaıdyń aldyńǵy qatarly agrotehnologııasyn kórsetetin alań ashylady. Bul jaıynda búgin «Jibek jolynyń ǵylymı ınnovatsııasy jáne aýyl sharýashylyǵy bilimi alıansynyń» 2-shi otyrysynda QR Aýyl sharýashylyǵy birinshi vıtse-mınıstri Qaırat Aıtýǵanov málim etti, dep habarlaıdy QazAqparat.
«Taıaýda ǵana «Ulttyq agrarlyq ǵylymı-bilim berý ortalyǵy» aktsıonerlik qoǵamymyz QHR-diń eń iri joǵary tehnologııalar aımaqtarynyń birimen Qazaqstan aýmaǵynda Qytaıdyń aldyńǵy qatarly agrotehnologııalaryn kórsetetin alań qurý týraly kelisimge qol qoıdy», - dedi ol.
Sonymen qatar birinshi vıtse-mınıstr S.Seıfýllın atyndaǵy Qazaq agrotehnıkalyq ýnıversıtetiniń qytaılyq áriptesterimen yntymaqtastyq máselelerine de toqtaldy.
«QazATÝ bazasynda QHR-diń ǵylymı uıymdarymen jáne ýnıversıtetterimen birlesken otyrystardyń negizgi bóligi ótedi. 2011 jyldan beri ýnıversıtet birlesken jobalar aıasynda Qytaıdan ınfraqurylymdy damytýǵa jáne kadrlyq qamatmasyz etýge 500 mln. teńgeden astam mólsherde ınvestıtsııa tartty. Botanıkalyq baqtyń negizi qalanyp, aýyl sharýashylyǵyn mehanıkalandyrý ortalyǵy quryldy. Eki eldiń 80-nen astam oqytýshylary ózara taǵlymdamadan ótti. Kúni keshe ǵana Aqmola oblysynyń Tselınograd aýdanyndaǵy QazATÝ-dyń dalalyq jumystarǵa arnalǵan kampýsynda zamanaýı sýǵarý qurylǵysy iske qosyldy. Osylaısha, 30 gektar aýmaqta qurǵaq jaǵdaıda kartop egý tehologııasy boıynsha zamanaýı statsıonar qurý aıaqtaldy», - dedi Qaırat Aıtýǵanov.
