Qazaqstanda qystyń eń sýyq kúnderi aqpanda bolady
ALMATY. QazAqparat - Qazaqstannyń kóptegen aýmaǵynda qystyń eń sýyq aıy aqpanda bolady, dep habarlaıdy «QazAqparat» HAA-nyń tilshisi «Qazgıdromet» RMK Almaty qalalyq bólimshesiniń Meteorologııalyq boljam bóliminiń basshysy Svetlana Amanqulovaǵa silteme jasap.
«Mańǵystaý, Atyraý, Qyzylorda, Ońtústik Qazaqstan, Jambyl, Almaty oblystarynyń basym bóliginde, Batys Qazaqstan jáne Aqtóbe oblystarynyń keıbir jerlerinde aýa temperatýrasy orta eseppen (jeltoqsan - red.) -5, +2 dep kútilýde. Soltústik Qazaqstan, Pavlodar jáne Shyǵys Qazaqstanda -6,-17 bolatyny josparlanýda. Al, qalǵan óńirlerde aýa temperatýrasy turaqty. Pavlodar, Shyǵys Qazaqstan oblystary, sondaı-aq Almaty oblysynyń kóp bóliginde, Qostanaı, Soltústik Qazaqstan, Qaraǵandy jáne Jambyl men Ońtústik Qazaqstan oblystarynyń taýly jáne taý bókterindegi aımaqtarda jaýyn-shashynnyń aılyq mólsheri shamadan tys. Atyraý, Mańǵystaý, Batys Qazaqstan oblystarynyń kóp bóliginde jáne Aqtóbe, Qaraǵandy, Qyzylorda, Ońtústik Qazaqstan oblystarynda jaýyn-shashyn mólsheri az bolady dep kútilýde», - deıdi Svetlana Amanqulova.
Maýsymdyq boljam boıynsha qańtar aıynda Shyǵys Qazaqstan, Almaty, Jambyldyń ońtústik bóligi jáne Ońtústik Qazaqstan oblystarynda aýa temperatýrasy qalypty, al basqa aımaqtarda Tselsıı baǵamy boıynsha qalypty shamadan bir gradýs tómen. Soltústik Qazaqstan, Aqmola, Qostanaı, Aqtóbe jáne Mańǵystaý, Batys Qazaqstan, Atyraý oblystarynda qańtar aıynda jaýyn-shashyn mólsheri az bolady.
Al Pavlodar, Qaraǵandy, Qyzylorda, Shyǵys Qazaqstan, Almaty, Jambyl, Ońtústik Qazaqstan oblystarynda jaýyn-shashyn mólsheri turaqty.
«Aqpan aıynda Batys Qazaqstan, Atyraý, Mańǵystaý oblystarynda aýanyń ortasha temperatýrasy qalypty. Elimizdiń basqa aýmaqtarynda aqpan aıynda temperatýra tómendeıdi, ıaǵnı Qazaqstannyń kóptegen aýmaǵynda qystyń eń sýyq aıy aqpan bolady. Batys Qazaqstan, Atyraý, Mańǵystaý, Qyzylorda, Ońtústik Qazaqstan oblystarynda aqpan aıynda jaýyn-shashyn mólsheri az bolady. Al, qalǵan aımaqtarda - qalypty dep kútilýde», - deıdi ol.
