Qazaqstanda qysta kartop 300 teńgege deıin qymbattaýy múmkin
ASTANA. QazAqparat - Іrili-usaqty saýdagerlerdiń taýar baǵasyna qoıatyn ústeme baǵasyn eskersek, bıyl qysta Qazaqstandaǵy 1 keli kartoptyń baǵasy 250-300 teńgege deıin jetýi múmkin, dep habarlaıdy «QazAqparat» HAA energyprom.kz-ke silteme jasap.
Bıyl sharýalar kartop baǵasy kúrt qymbattaıdy dep otyr. Buǵan sebepter kóp, máselen, elimizdegi jáne kórshi elderdegi aýa aýa raıy bıyl eginge qolaısyz keldi, ónimdi jetildirýge ketetin shyǵyndar kóbeıgen. 1 gektar alqapta kartop ósirý úshin ortasha 1 mln teńge jumsaldy, al ortasha ónimdilik gektaryna 230 tsentnerdi qurady. Dál qazir 1 keli kartoptyń kóterme baǵasy 55 teńge, al ádette kúz mezgilinde 35 teńgeden aspaıtyn.
55 teńge jaǵdaıynda sharýalar azdaǵan paıda kóredi. Az ýaqyttan soń kartopty qoımaǵa saqtaýǵa týra keledi: budan ónimniń 10%-i taǵy da shyǵynǵa ushyraıdy, onyń ústine saqtaý shyǵyndary da qosylady. Buǵan sharýalardyń kartop baǵasynyń ósýin kútip, ádeıi ónimdi satpaı ustap otyrǵanyn qosyńyz. Budan qysta kartopqa qoıylatyn óndirisshi baǵasynyń ortasha 90-130 teńge aınalasynda bolady dep joramaldaýǵa bolady.
Qyrkúıek aıynyń qorytyndylary boıynsha 2017 jyly Qazaqstanda qııardyń baǵasy kúrt artqany baıqaldy, tamyzben salystyrǵanda - 20,4%. Al keıbir kókónis túrleri arzandaǵan: pııaz - 24,8%, sábiz - 14,9%, kartop - 9,7%, qyzylsha men qyryqqabat - 7,7%, qyzanaq - 7,1%, sarymsaq - 4,3%. Jemisterdiń arasynda tek maýsymdyq emes apelsın ǵana 2,8% qymbattaǵan. Basqa ónimderdiń baǵasy 1% shamasynda ǵana qymbattaǵan. Birshama qymbattady dep sút ónimderin aıtýǵa bolady: shıki jáne pasterlengen sút - 3,2% jáne aıyna 1,9%, irimshik - 1,9%, qaımaq - 1,1%. Basqa túrdegi sút ónimderi tamyzben salystyrǵanda 0,5-1% tóńireginde qymbattaǵan.
Qyrkúıekte qymbattaǵan ónimderdiń ishinde balyq jáne tońazytylǵan balyq ta bar - aıyna 1,7%, balyq konservileri de bar - 1,3%. Іri qara eti - 1,2%, iri qaranyń baýyry - 1,1%, shoshqa eti - 1% qymbattaǵan. Et ónimderiniń baǵasy kóterilgen: jartylaı súrlengen shujyq - 1,2%. Al taýyq eti azdap arzandaǵan - aıyna 0,1%.
Un ónimderinen aıtarlyqtaı qymbattaǵandar: pispenan - 1,3%, pirándik - 0,6%. Vermıshel 0,6%, makaron 0,5% qymbattaǵan. Jarmalardan eń kóp qymbattaǵany kúrish boldy - 0,8%, odan keıin arpa jarmasy tur - 0,6%. Qaraqumyq jarmasy arzandap jatyr - bir aıda 2,6%, al jyldyq arzandaý kórsetkishi 23,3%-ke jetti.
Qazaqstanda táttiler de arzandady: tamyzben salystyrǵanda karamel - 1,2%, kámpıtter - 1%. Erekshe atap aıtatyn jaıt, qant bir aıda birden 10,5% arzandady. Araq - 0,6%, aýyz sý 0,2%-ke qymbattaǵan.
