Qazaqstanda qysqy Azıada oıyndaryn ótkizý memleket bedeliniń artýyna kómektesedi - Bolgarııanyń dene shynyqtyrý jáne sport mınıstri S.Neıkov
ANA. 9 jeltoqsan. QazAqparat - Sofııada Qazaqstan Respýblıkasynyń senimdi ókili Temirtaı Іzbastın men Bolgarııanyń Dene shynyqtyrý jáne sport mınıstri Svılen Neıkovtyń kezdesýi bolyp, onyń barysynda sport pen dene shynyqtyrý salasyndaǵy yntymaqtastyq máseleleri talqylandy.
Bul týraly QR Syrtqy ister mınıstrliginiń baspasóz qyzmeti habarlap otyr.
Dıplomatııalyq mıssııa basshysy suhbattasýshysyn Qazaqstandaǵy áleýmettik-ekonomıkalyq úderistermen, sonyń ishinde sport salasynda júrgizilip otyrǵan saıasatpen habardar etti. Qazaqstan elshisi QR Prezıdenti Nursultan Nazarbaev sportty qoǵam damýynyń basty baǵyttary qataryna jatqyzatyndyǵyn atap ótip, salaýatty ómir saltyn saqtaý Memleket basshysynyń Qazaqstan halqyna Joldaýynda 2020 jylǵa deıin qazaqstandyqtardyń buqaralyq sportpen aınalysý úlesi 30 paıyzǵa deıin artý týraly mindetpen kórsetilgenine toqtaldy.
S.Neıkov óz tarapynan Bolgarııadaǵy sport damýy salasyndaǵy qazirgi jaǵdaı týraly aıtyp, bizdiń elimizde alǵash ret ótkeli otyrǵan qysqy Azıada oıyndaryna erekshe toqtaldy. Onyń aıtýynsha, «Qazaqstanda osyndaı halyqaralyq deńgeıdegi sport sharasynyń ótkizilýi memleket bedeliniń artýyna kómektesedi».
Suhbattasýshylar eki jaqty baılanysty ońtaılandyrý jónindegi múddelerin ortaǵa salyp, dene shynyqtyrý men sport salasyndaǵy yntymaqtastyq týraly kelisimge tezirek qol qoıýǵa qoldaý tanytty. Sonymen qatar eki eldiń komandalaryn Bolgarııaǵa jınaıtyn ártúrli is-sharalar ótkizý múmkindikteri men tájirıbe almasý máseleleri qaraldy.
