Qazaqstanda qyrkúıekte tennısten birneshe halyqaralyq jarys ótedi
NUR-SULTAN. QazAqparat - Qazaqstanda qyrkúıekte Azııa tennıs federatsııasy (ATF) jáne Tennis Europe serııasy boıynsha birneshe jarys ótedi, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, 3-19 qyrkúıek aralyǵynda Shymkentte ATF serııasy boıynsha eń joǵary A sanatymen eki jáne 14 jasqa deıingiler arasynda birinshi sanattaǵy jarys bolady.
Almaty qalasynda sol merzimde Tennis Europe serııasy boıynsha 14 jasqa deıingiler arasynda taǵy eki doda uıymdastyrylmaqshy.
Bul týrnırlerdiń ereksheligi - ár qatysýshy keminde bes match ótkizedi. Bul oıynshynyń sheberligin ushtaý úshin mańyzdy.
«Osyndaı deńgeıdegi jarystardy senip tapsyrǵany úshin Azııa tennıs federatsııasy men Tennis Europe qaýymdastyǵyna alǵysymdy bildiremin. Týrnırlerdi joǵary deńgeıde ótkizý úshin bar kúshimizdi salamyz. Qatysýshylardyń tamaǵy men jatatyn orny uıymdastyrýshylar esebinen tólenedi», - dedi federatsııanyń 10-14 jastaǵy oıynshylardy damytý jónindegi menedjeri Shýhrat Kaıýmov.
Eske sala keteıik, budan buryn Anna Danılınanyń Varshava týrnıriniń shırek fınalyna shyqqanyn jazǵan bolatynbyz.
