Qazaqstanda qymyz sharýashylyǵyn damytatyn zań kerek
ASTANA. 21 qarasha. QazAqparat - Qazaqstanda qymyzdy damytatyn arnaıy zań nemese baǵdarlama kerek. Búgingi Májilistiń jalpy otyrysynda úkimet basshysynyń atyna saýal joldaǵan depýtat Aldan Smaıyl osylaı málim etti.
«Qymyz óndirisin memlekettik ekonomıkalyq saıasat dińgegine aınaldyrý kerek. Máselen, Reseıde, atap aıtqanda, Saha Respýblıkasynda, atalǵan másele qymyz óndirisi týraly jeke zańmen retteledi. Mundaı salalyq zańnyń arqasynda qymyz óndirýshilerge sút óndirýshilerge qaraǵanda eki ese artyq qarajat bólinedi. Jeńildetilgen nesıe bólinedi, al elektr jáne tasymaldaýǵa ketetin shyǵyndy ishinara úkimet qaıtarady», - deıdi A. Smaıyl.
Onyń aıtýynsha, Qazaqstanda kóp ǵasyrlyq tarıhy bar sýsynnyń ulttyq mańyzy men qundylyǵy baǵalanbaı otyr. Sonyń saldarynan qazaqtan góri basqa elder qymyzdy ótimdi sýsynǵa aınaldyryp aldy. Osy rette depýtat Reseıde arnaıy zańnyń bolýy qymyzdy damytýda zor nátıjesin berip jatyr. Máselen, ol elde bıe sútinen 500 tonna balalar taǵamyn óndiredi. Qymyz óndirýmen 80-nen astam mamandandyrylǵan fırma aınalysady.
«Damyǵan elderde ǵalymdar qymyz quramynda bolatyn laktoferıt aqýyzynan qaterli isikke qarsy dári óndirisine kirisip jatyr. Aıtalyq Germanııada kosmetıkalyq buıymdar men qymyzdan balmuzdaq jasaıtyn 50-den astam qymyz sharýashylyqtary bar. Chehııa, Polsha men Frantsııa bıe sútinen ónim óndirýge kirispekshi. Endeshe Qazaqstanda da qymyz óndirisine barynsha kóńil bólip, qymyz týraly memlekettik baǵdarlama nemese zań ázirleý kerek», - deıdi depýtat A. Smaıyl.
