Qazaqstanda qymbat kólikterge suranys bar ma
ASTANA. QazAqparat - 2018 jyldyń birinshi toqsanynda Qazaqstanda 86,3 mlrd teńgege 11 281 jańa jeńil avtokólik satyp alyndy. Bul týraly «QazAvtoÓnerkásip» avtokólik salasyndaǵy kásiporyndar odaǵy málim etti, dep habarlaıdy QazAqparat.
«Jeńil avtokóliktiń ortasha quny 7 652 231 teńgeni qurady jáne ótken jyldyń sáıkes kezeńimen salystyrǵanda 1,6 paıyzǵa arzandady. Qazaqstandyq naryqta 3,5 mln teńgeden arzan kólik modelderine suranys joǵary boldy. Olardyń úlesine satylǵan avtomobılderdiń 25 paıyzy tıesili (2 817 kólik). Bir jyldyń ishinde bıýdjettik segmenttiń úlesi 3,2 paıyzǵa ósti», - dep atap ótilgen habarlamada.
Sonymen qatar ótkizilgen kólikterdiń eleýli (19,4 paıyzyn; 2192 kólik) bóligin 3,5-5 mln teńge aralyǵyndaǵy ortasha baǵa sanatyndaǵylar qamtydy. Budan bólek, jańa kólik ıeleriniń 19,2 paıyzy 7-den 10 mln teńgege deıingi (2162 kólik) avtomashınalardy tańdady. Esepti kezeńde olardyń úlesi 6,3 paıyzǵa artty.
Al 17,9 paıyzy 5-7 mln teńge somasyndaǵy temir tulparlarǵa tańdaý jasaǵan.
«Bıznes (10-15 mln teńge) jáne premıým (15 mln teńgeden joǵary) sanattaǵy segmentterdiń árqaısysyna naryqta 9 paıyzdan tıesili boldy. Jalpy 10 mln teńgeden qymbat tehnıkanyń úlesi 3 paıyzǵa qysqaryp, búginde 18,5 paıyzdy qurady», - delingen «QazAvtoÓnerkásip» málimetinde.
Qoljetimdigi joǵary modelderdiń reıtınginde otandyq avtokólikter basymyraq. Baǵa jaǵynan 2,59 mln teńgeden bastalatyn Lada Granta-ǵa tańdaý kóbirek túsken.
Eń qoljetimdi avtomobılderdiń TOR-10 quramyna Ravon R2 (2,6 mln teńge), Ravon Nexia (2,7 mln), Lada 4x4 (3 mln), Ravon R4 (3,1 mln), Lada Kalina (3,3 mln), Lifan Solano II (3,5 mln), Ravon Gentra (3,6 mln), Lada Vesta (3,7 mln) jáne Peugeot 301 (4 mln teńge) endi.
