Qazaqstanda qylmystyq jolmen alynǵan kirister boıynsha ahýal jaqsarmasa, Eýrazııalyq toptyń kúsheıtilgen sharalary qoldanylýy múmkin
Bul týraly búgin Májiliste Qarjy vıtse-mınıstri Ardaq Teńgebaev málim etti. Eske salaıyq, Májiliste «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasynyń tusaýkeseri ótken edi.
Aıta keterligi, Qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl jónindegi Eýrazııalyq top osy salada Qazaqstanǵa birqatar eskertýler jasaǵan eken. Ondaı kemshilikterdi Qazaqstan aǵymdaǵy jyldyń qarasha aıyna deıin joıýy tıis.
«2015 jyldyń qarashasyna deıin Qazaqstannyń qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ahýal ózgermese Eýrazııalyq top Qazaqstanǵa qarsy kúsheıtilgen sharalar qoldanýy múmkin. Máselen, olar shetelde qandaı da bir tólemderdi júzege asyratyn azamattardyń quqyqtaryn shekteýi, kommertsııalyq bankterdiń shet memleketterdiń qarjy mekemelerimen qarym-qatynasyn qıyndatýǵa, sheteldik ınvestorlar úshin ekonomıkanyń ınvestıtsııalyq tartymdylyǵynyń aıtarlyqtaı tómendeýine ákep soqtyrýy múmkin. Sonymen qatar, bul sharalar syrtqy saýda kóleminiń edáýir qysqarýyna áser etýi de joqqa shyǵarylmaıdy», - dedi Qarjy vıtse-mınıstri Ardaq Teńgebaev.
Onyń aıtýynsha, zań jobasyn qabyldaýdyń kóleńkeli ekonomıkanyń jáne sybaılas jemqorlyq quqyq buzýshylyqtar kóleminiń azaıýyna, ınvestıtsııalyq tartymdylyq pen ekonomıkalyq tıimdiliktiń ulǵaıýyna yqpal etetini boljanady. Bul bıýdjetke túsetin salyqtyq túsimderdiń ulǵaıýyna jáne azamattar quqyqtarynyń saqtalýyna járdemdesedi.