Qazaqstanda «Qylmystyq quqyqbuzýshylyqtar kartasy» atty ınternet-portal jumys isteıtin bolady
ASTANA. QazAqparat - Qazaqstanda ishki ister organdary jumysynyń ashyqtyǵy men qoǵam tarapynan qadaǵalanýyn kúsheıtý maqsatynda 2016 jyldyń sońynda «Qylmystyq quqyqbuzýshylyqtar kartasy» atty ınternet-portal ashylmaq.
Bul týraly búgin Ortalyq kommýnıkatsııalar qyzmetinde QR Bas prokýratýrasynyń quqyqtyq statıstıka jáne arnaıy esep komıtetiniń tóraǵasy Sáýle Aıtpaeva málim etti.
Jobany tolyq iske asyrý maqsatynda 8 monoqalalar men 250 aýdandyq ortalyqtar kirgizilmek. Kartaǵa barlyq iri eldi mekender enetin bolady. Osylaısha, biz Qazaqstan Prezıdentiniń 32 qadamyn oryndaý boıynsha keshendi uıymdastyrýshylyq-tájirıbelik sharalardan keıin atalǵan ınternet-portaldy 2016 jyldyń sońyna qaraı iske qosýdy josparlap otyrmyz», - dep atap ótti ol.
Onyń aıtýynsha, portal azamattar úshin jáne quqyq qorǵaý organdary úshin ashyq jáne jabyq bólimderden turady. Ashyq bóliminde belgili bir aımaqta, belgili bir ýaqytta bolǵan aýyrlyǵy ártúrli qylmystar týraly aqparattar bolady. Sonymen qatar, kez kelgen azamat óziniń turyp jatqan jerdiń radıýsyn belgilep, karta arqyly osy aýdanda tirkelgen quqyq buzýshylyqtar týraly aqparattardy bile alady.
Jabyq bólimde polıtsııa pýnkteri, jyljymaly beketter men kameralar týraly aqparattar kórsetilip otyrady. Polıtsııa bólimshesiniń jetekshisi óziniń quzyryndaǵy aýdandy onlaın-rejımde baqylaıdy. Sol arqyly ol qylmystyń eń kóp jasalatyn oryndaryna kúshterdi tıimdi ornalastyrýǵa múmkindik almaq.
«Tirkelgen qylmystar týraly barlyq málimetter «Qylmys kartasynda» kórinis taýyp otyrady. Ol QR Bas prokýratýrasynyń saıtynda «Aqparattyq qyzmetter» bóliminde ornalasqan», - dep atap ótti QR Bas prokýratýrasynyń ókili.
