Qazaqstanda qylmystyq kiristerge tosqaýyl qoıýdyń jańa tártibi engizilmek
NUR-SULTAN. QazAqparat – Búgin Parlament Májilisinde «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy tanystyryldy.
«Qazaqstan basqa da elder sııaqty Qylmystyq jolmen alynǵan kiristerdi jylystatýmen, terrorızmdi qarjylandyrýmen jáne jappaı qyryp-joıý qarýynyń taralýymen kúresýge tıis. Bul rette qarjy monıtorıngi ulttyq júıesiniń halyqaralyq standarttarǵa sáıkes kelýi mańyzdy. Bizdiń júıe sáıkes kele me nemese kelmeı me? Bul suraqqa biz 2021-2022 jyldary elimiz ótýge tıisti Qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń (EAT) Qazaqstan Respýblıkasyn ózara baǵalaý nátıjesi boıynsha jaýap ala alamyz. Biz úshin baǵalaýdyń oń nátıjelerin alýdyń zor mańyzy bar. Osy maqsatta engizilgen zań jobasyn qabyldaý qajettigi týyndaıdy», - dedi QR Qarjy vıtse-mınıstri Qanat Baedilov.
Onyń sózine qaraǵanda, EAT-tyń ózara baǵalaýynan sátti ótý maqsatynda Qazaqstan Respýblıkasy qazirgi sátte ulttyq zańnamada iske asyrylmaǵan birqatar jańa standarttardy, onyń ishinde baǵalaýdyń ótken raýndy nátıjesinde alynǵan usynymdardy zańnamalyq turǵyda bekitýi qajet. Baǵalaýdan ótý kezinde elimiz ulttyq zańnamanyń FATF-tyń (Qarjylyq teris qylyqtarǵa qarsy kúres jónindegi halyqaralyq top) halyqaralyq standarttaryna sáıkes keletinin kórsetýi tıis.
«Osy zań jobasynyń maqsattary - Birikken Ulttar Uıymy Qaýipsizdik Keńesiniń qararlaryn iske asyrý tetikterin qurý, halyqaralyq standarttardy engizý jáne ulttyq júıeni odan ári jetildirý», - dedi vıtse-mınıstr.
Aıta keteıik, FATF usynymdary jappaı qyryp-joıatyn qarýdy taratýdy qarjylandyrýǵa (JQQTQ) qarsy is-qımylǵa qatysty jańa talaptardy kózdeıdi.
Osy oraıda zań jobasynda BUU Qaýipsizdik Keńesiniń qararlary negizinde jappaı qyryp-joıatyn qarýdy taratýdy qarjylandyrýǵa (JQQTQ) qatysy bar uıymdar men tulǵalardyń tizbesin jasaý boıynsha qarjy monıtorıngi jónindegi ýákiletti organnyń quzyretin belgileý eskerilgen. Osy tizbege engizilgen tulǵalardyń memlekettik shekarany kesip ótýi týraly BUU Qaýipsizdik Keńesiniń komıtetterine habarlamalar jiberý kózdelgen.
FATF-tyń halyqaralyq standarttaryn iske asyrý maqsatynda zań jobasyna kommertsııalyq emes sektordy terrorızmdi qarjylandyrý maqsatynda paıdalanýdan qorǵaýǵa baılanysty jańalyqtar engizildi. Zań jobasynda Vedomstvoaralyq keńes qurý usynylady, onda aqshany jylystatý jáne terrorızmdi qarjylandyrý táýekelderin tómendetýge baǵyttalǵan sharalar ázirlenedi jáne sharalardy iske asyrý nátıjesi qaralady.
«Usynylǵan normalar aldyn alý sıpatynda jáne ulttyq qarjy júıesiniń qaýipsizdigin arttyrýǵa, aqshany jylystatý jáne terrorızmdi qarjylandyrý úshin kásipkerlik sýbektileri men kommertsııalyq emes uıymdardy paıdalanýdan qorǵaýǵa baǵyttalǵan. Halyqaralyq mindettemelerdi oryndaý bizdiń elimizdiń ashyq qarjy júıesi bar qaýipsiz el retinde ınvestıtsııalyq ımıdjin arttyrýǵa yqpal etedi», - dedi Qanat Baedilov.
