Qazaqstanda qylmystyq ister sottalýshysyz qarala bastady
ASTANA. QazAqparat - Bıyldan bastap qylmystyq ister boıynsha sot otyrystaryn sottalýshynyń qatysýynsyz ótkizýge bolady, dep habarlaıdy QazAqparat tilshisi.
Aıta ketken jón, ótken jyly QR Qylmystyq is júrgizý kodeksine buıryq óndirisiniń tártibi boıynsha ózgerister engizilgen bolatyn. Jyldyń basynda atalǵan ózgerister kúshine endi. Kodekstiń 629-1 baby, 4-tarmaǵyna sáıkes, sýdıa sottalýshyny shaqyrmaı-aq, qylmystyq isti qaraı alady.
Qyzylorda qalasynda qylmystyq is júrgizýdiń jańa tártibi boıynsha sot otyrysy ótti. Onda 2-kýrs stýdenti K. esimdi azamattyń isi qaraldy. Sot materıaldaryna sáıkes, ol ózimen birge sýyq qarý sanalatyn «kastet» ustap júrgen. Stýdent temirjol vokzalyndaǵy rengtgen apparatynan ótken kezde kúzet qyzmeti onyń sómkesinen kastetti tapty. Atalǵan quqyq buzýshylyq úshin QR Qylmystyq kodeksiniń 10-baby, 3-tarmaǵy boıynsha jaýapkershilik qarastyrylǵan.
«Sottalýshy Almaty qalasyndaǵy ýnıversıtette oqıdy. Qazirgi kezde ol emtıhandardy tapsyryp júr. Osyǵan baılanysty qylmystyq isti protsessýaldy buıryq tártibi boıynsha ótkizý týraly ótinishhat berildi. Sot K. esimdi azamatty kináli dep tanyp, 25 aılyq eseptik kórsetkish kóleminde aıyppul tóleýge mindettedi», - delingen sottyń resmı habarlamasynda.
Aıta keteıik, buǵan deıin elimizde tek azamattyq ister ǵana sottalýshysyz qaralyp keldi.
