Qazaqstanda kvasty, gazdalǵan sýsyn men sýdy qaı qalada arzanǵa satyp alýǵa bolady
ASTANA. KAZINFORM – Dárigerler aptap ystyqta shóldi basý úshin gazdalǵan tátti sýsyndardyń ornyna kádimgi sý ishýge keńes bergenimen, bul qazaqstandyqtardyń súıikti salqyn sýsyndardan bas tartýyna sebep bolmaı otyr. Eldiń ár qalasynda kvas, gazdalǵan sýsyndar men sýdyń baǵasy qansha turatynyn Kazinform tilshisi anyqtap kórdi.
Salystyrý barysynda úsh sanattaǵy sýsynnyń baǵasy negizge alyndy, atap aıtqanda kvas, tátti gazdalǵan lımonadtar jáne gazdalǵan aýyz sý. Esepteý kezinde kólemi 1 lıtrlik bótelkedegi ónimderdiń eń tómengi baǵasy eskerildi.
Kvas
Nan, ýyt jáne ózge de tabıǵı ónimderden daıyndalatyn kvastyń eń arzan baǵasy Taldyqorǵanda tirkeldi. Munda 1 lıtrlik bótelke 300 teńgeden bastalady.
Odan keıin Shymkentte baǵa 340 teńgeden, Túrkistanda 350 teńgeden bastalady. Pavlodarda jergilikti óndiristegi kvasty 395-400 teńgege satyp alýǵa bolady.
Aqtóbede kvastyń baǵasy 400 teńgeden, Petropavlda 440 teńgeden, Aqtaýda 450 teńgeden bastalady. Qaraǵandy men Qostanaıda eń tómengi baǵa – 480 teńge.
Eldegi eń jıi kezdesetin tómengi baǵanyń biri – 500 teńge. Mundaı baǵamen kvasty Kókshetaý, Oral, Jezqazǵan jáne Qyzylorda qalalarynan tabýǵa bolady.
Astana men Tarazda kvastyń baǵasy 550 teńgeden bastalsa, Atyraýda 560 teńgeden satylady. Almatyda bul sýsynnyń eń tómengi baǵasy 600 teńge bolsa, eń qymbat kvas Óskemen men Semeıde tirkeldi – 700 teńgeden bastalady.
Gazdalǵan tátti sýsyndar
Bul sanatqa túrli tátti lımonadtar men qatty gazdalǵan sýsyndar kiredi. Keıbir qalalarda olardyń baǵasy 1 lıtri úshin 1000 teńgeden asyp ketedi.
Eń arzan gazdalǵan tátti sýsyn Tarazda satylyp jatyr – 195 teńgeden. Keıingi oryndarda Shymkent, Atyraý jáne Túrkistan tur. Bul qalalarda baǵa 250 teńgeden bastalady. Oralda – 280 teńgeden.
Petropavl men Taldyqorǵanda gazdalǵan sýsyndardyń baǵasy 300 teńgeden, Qostanaıda 330 teńgeden, Pavlodarda 350 teńgeden bastalady.
Qyzylorda, Kókshetaý jáne Aqtaýda mundaı sýsynnyń lıtri keminde 400 teńge turady.
Qaraǵandyda eń tómengi baǵa – 445 teńge, Aqtóbede – 480 teńge, Jezqazǵanda – 485 teńge, al Almatyda – 500 teńge.
Eń joǵary bastapqy baǵalar Astana, Semeı jáne Óskemende tirkeldi. Bul qalalarda gazdalǵan tátti sýsynnyń baǵasy 600 teńgeden bastalady.
Gazdalǵan sý
Endi gazdalǵan aýyz sýdyń baǵasyn qarastyraıyq. Onyń quny kádimgi bótelkedegi aýyz sýmen salystyrǵanda aıtarlyqtaı erekshelenbeıdi. Degenmen dárigerler aptap ystyqta sý ishýdiń densaýlyqqa paıdaly ekenin atap ótedi. Onyń ústine kóptegen óńirde sý ózge sýsyndarǵa qaraǵanda áldeqaıda arzan.
Gazdalǵan sýdyń eń tómengi baǵasy Tarazda – 195 teńge. Atyraý men Taldyqorǵanda – 200 teńgeden, Pavlodarda – 220 teńgeden, Túrkistanda – 230 teńgeden bastalady.
Qyzylordada 1 lıtrlik gazdalǵan sýdy 250 teńgeden satyp alýǵa bolady.
Eldegi eń keń taralǵan eń tómengi baǵa – 300 teńge. Mundaı baǵamen gazdalǵan sý Kókshetaý, Oral, Petropavl, Almaty, Óskemen, Semeı jáne Shymkentte satylady.
Aqtóbede baǵa 325 teńgeden, Qaraǵandyda 335 teńgeden, Jezqazǵan men Aqtaýda 350 teńgeden, Qostanaıda 370 teńgeden bastalady.
Al gazdalǵan sýdyń eń tómengi baǵasy Astanada tirkeldi – 1 lıtri 400 teńgeden bastalady.
Eske salsaq, osyǵan deıin áleýmettik mańyzy bar azyq-túlik baǵasynyń ósý qarqyny tórt ese baıaýlaǵany habarlanǵan.
