Qazaqstanda kúzetshiler, patrýldik ınspektorlar men medbıkeler jetispeıdi - zertteý
NUR-SULTAN. QazAqparat - Qazaqstanda jumyssyzdyq azaıdy: bir jyl ishinde jumyssyzdar sany 0,1% tómendedi, dep habarlaıdy QazAqparat finprom.kz saıtyna silteme jasap.
2019 jyldyń tórtinshi toqsanynda jumyspen qamtylǵandar sany 8,8 mln adamdy qurap, bir jylda 0,7% artty. Ótken jyldyń sáıkes kezeńinde kórsetkish 8,7 mln adam boldy.
Eńbekke ornalastyrý boıynsha eń joǵary kórsetkish – elordada. Munda jyldyq ósim 9,2% qurap, 553,6 myń adamdy qurady. Atyraý oblysynda jumyspen qamtylǵandar sany 4,1%, Almatyda - 2,9% artty.
Eki qolǵa bir kúrek tapqandardyń basym bóligi kóterme jáne bólshek saýda sektorynda jumys isteıdi; avtomobılderdi jáne mototsıklderdi jóndeý salasynda: 1,4 mln adam nemese jalpy kórsetkishtiń 16,3%. Kósh basyndaǵy salalardyń úshtigine aýyl, orman jáne balyq sharýashylyǵy (1,2 mln adam nemese 13,4%), bilim berý (1,1 mln adam nemese 12,7%) kirdi. Sondaı-aq alǵashqy bestikke ónerkásip (1,1 mln adam) jáne qurylys (642,2 myń adam) salalary engen.
Eldegi jumyssyz halyq sany 441,4 myń adamdy qurap, 2018 jyldyń osy kezeńimen salystyrǵanda 0,1% (441,9 myń adam) azaıǵan. Soǵan qaramastan, Qazaqstanda jumyssyzdyq deńgeıiniń máni ózgerissiz qaldy - 4,8%.
Elektrondyq eńbek bırjasynyń málimetteri boıynsha, eldegi eń tapshy mamandyqtar arasynda kúzetshi, qazandyq operatory, patrýldik ınspektor, medıtsına qyzmetkerleri (orta medıtsına qyzmetkeri), tárbıeshiler bar. Mamandar sany kóp mamandyqtarǵa zańger, jaldamaly mamandar, ekonomıst, mal ósirýshi, qarjyger jatady.
Jumyssyzdardyń basym bóligi dástúrli túrde halyq kóp qonystanǵan óńirlerde baıqalady. Máselen, jumyssyz halyqtyń eń kóp sany Almatyda (jylyna 49,2 myń adam, +0,8%), sondaı-aq Almaty oblysynda (48,2 myń adam) jáne Túrkistan (42,1 myń adam) oblystarynda. Sondaı-aq bul tizimde Shyǵys Qazaqstan men Qaraǵandy oblystary (sáıkesinshe 34,5 myń jáne 29,7 myń adam) bar. Jumyssyzdyqtyń joǵary deńgeıi Túrkistan oblysy, Almaty men Shymkentte baıqalady - 5,1%.
