Qazaqstanda kúzet qyzmetimen aınalysý salasyna ózgerister engizildi
NUR-SULTAN. QazAqparat - «Qazaqstan Respýblıkasynyń keıbir zańnamalyq aktilerine kúzet qyzmeti máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
Zań jobasyna QR Parlamenti depýtattarynyń bir toby bastamashylyq etti. Onyń negizgi maqsaty - kúzet qyzmeti salasyndaǵy zańnamany jetildirý.
«Qazaqstandaǵy jeke kúzet uıymdary azamattar men zańdy tulǵalardyń ómirin, densaýlyǵyn jáne múlkin qorǵaý jóninde quqyqtyq tártipti qamtamasyz etýde memlekettik organdarǵa belsendi kómek kórsetý boıynsha mańyzdy mıssııany oryndaıdy. Qazirgi kezde Qazaqstanda 5127 jeke kúzet uıymy bar. Bul rette kúzetý jáne qarýdy alyp júrý quqyna lıtsenzııasy bar bilikti kúzetshilerdiń sany 97 116 adamǵa jetti. Ótken jyly jeke kúzet kúshteri tarapynan 605 qylmystyq quqyqbuzýshylyq, 11 myńnan astam ákimshilik quqyqbuzýshylyq anyqtaldy. 11,5 myń quqyq buzýshy ustalyp, polıtsııaǵa berildi. Sonymen qatar, 1200-ge jýyq urlyqtyń aldyn aldy», - dedi Májilis depýtaty Arman Qojahmetov
Zań jobasynda kúzet qyzmetterin kórsetý sapasyn arttyrýǵa, azamattardyń múliktik jáne jeke quqyqtaryn qorǵaýdy jetildirýge ári osy saladaǵy qoldanystaǵy zańnama normalarynyń jekelegen sáıkessizdikterin joıýǵa baǵyttalǵan birqatar túzetýler kózdeledi.
Zań jobasynda QR Eńbek kodeksine jáne «Kúzet qyzmeti týraly» Zańyna ózgerister men tolyqtyrýlar qarastyrylǵan.
«Atap aıtqanda, Qazaqstan Respýblıkasy Eńbek kodeksiniń 52-babyna jumysker zańnamada belgilengen, kásiptik qyzmetke qoıylatyn qosymsha arnaıy talaptarǵa saı kelmegen jaǵdaıda jumys berýshiniń bastamasymen eńbek shartyn buzý negizderin naqtylaýǵa qatysty túzetý engizý usynylyp otyr. Budan basqa, «Kúzet qyzmeti týraly» QR Zańynan buryn teris sebeptermen jumystan shyqqan adamdarǵa kúzetshi laýazymynda jumys isteýge tyıym salý týraly normalardy alyp tastaý usynylady, ótkeni zańnamada «teris sebeptermen jumystan shyǵarý» degen uǵym joq jáne Eńbek kodeksinde osy negizder boıynsha eńbek sharttaryn buzý kózdelmeıdi», - dep túsindirdi depýtat.
Sonymen qatar, QR Eńbek kodeksinde jáne «Kúzet qyzmeti týraly» Zańynda ártúrli túsindiriletin «arnaýly kıim» uǵymynyń anyqtamasyndaǵy túrli túsinikti joıý maqsatynda keıbir túzetýler engizý usynylǵan.