Qazaqstanda kúz jyly ári qubylmaly bolady dep boljanyp otyr
ASTANA. KAZINFORM – Qazaqstannyń birqatar óńirinde 7 qyrkúıekke daýyldy eskertý jarııalandy. Eldiń batysy men soltústiginde jańbyr, naızaǵaı jáne qatty jel kútilse, keı óńirlerde aptap ystyq pen joǵary órt qaýpi saqtalady. Aldaǵy kúnderi aýa temperatýrasy birtindep tómendegenimen, jalpy bıylǵy kúz jyly ári qubylmaly bolady dep boljanyp otyr. Bul týraly Jibek Joly telearnasynyń «Búgin.LIVE» baǵdarlamasynda «Qazgıdromet» ókili Arýjan Muratova aıtty.
Sınoptıktiń málimetinshe, aldaǵy aptada Qazaqstannyń basym bóliginde aýa temperatýrasy tómendeıdi. Ásirese batys, soltústik-batys jáne soltústik óńirlerde aıtarlyqtaı salqyndaý kútiledi.
Batys Qazaqstan oblysynda 7-10 qyrkúıek aralyǵynda aýa temperatýrasy 17-25 gradýstan 13-18 gradýsqa deıin tómendeıdi. Aqtóbe oblysynda 7-10 qyrkúıekte temperatýra 30-35 gradýstan 13-18 gradýsqa deıin túsedi. Qostanaı oblysynda osy kezeńde aýa temperatýrasy 29-34 gradýstan 18-23 gradýsqa deıin tómendeıdi.
Soltústik óńirlerde de kún salqyndaıdy. Aqmola, Soltústik Qazaqstan jáne Pavlodar oblystarynda aýa temperatýrasy 27-30 gradýstan 18-23 gradýsqa deıin tómendeýi múmkin.
Ortalyq óńirlerde, sonyń ishinde Qaraǵandy oblysynda aldymen azdap jylyný baıqalyp, keıin aýa temperatýrasy 18-23 gradýsqa deıin tómendeıdi. Ulytaý oblysynda da salqyn aýa raıy kútiledi.
Al jaýyn-shashynǵa kelsek, 7-10 qyrkúıekte Batys Qazaqstan oblysynda, 8-10 qyrkúıekte Aqtóbe jáne Qostanaı oblystarynda jańbyr jaýady. 11-13 qyrkúıekte jaýyn-shashyn Soltústik Qazaqstan, Aqmola, Qaraǵandy jáne Ulytaý oblystarynda, 12-13 qyrkúıekte Pavlodar oblysynda kútiledi. Abaı oblysynda 13 qyrkúıekte jańbyr jaýýy múmkin.
Keı óńirlerde jaýyn-shashynnyń qatty bolýy yqtımal. Atap aıtqanda 7-8 qyrkúıekte Batys Qazaqstan oblysynda, 9-10 qyrkúıekte Aqtóbe oblysynda, 12-13 qyrkúıekte Qostanaı, Soltústik Qazaqstan, Aqmola, Qaraǵandy jáne Ulytaý oblystarynda qatty jańbyr boljanyp otyr.
Arýjan Muratovanyń aıtýynsha, jalpy bıylǵy kúz jyly bolady dep kútiledi. Jaýyn-shashyn mólsheri negizinen klımattyq normaǵa jýyq bolady.
– Qyrkúıek aıynda elimizdiń basym bóliginde ortasha temperatýra klımattyq norma shamasynda bolady. Batys Qazaqstan, Mańǵystaý jáne Atyraý oblystarynyń batysynda temperatýra normadan shamamen bir gradýs joǵary bolýy yqtımal. Qazan jáne qarasha aılarynda Qazaqstannyń kóptegen oblystarynda aýa temperatýrasy klımattyq normadan 1-2 gradýs joǵary bolady dep boljanady. Ońtústik-shyǵysta temperatýra negizinen klımattyq norma shamasynda saqtalady, – dedi ol.
Jaýyn-shashyn mólsheri boıynsha da óńirler arasynda aıyrmashylyq bolady. Sınoptıktiń boljamynsha, Qazaqstannyń qıyr batysy, soltústik-batysy jáne soltústik-shyǵysynda jaýyn-shashyn mólsheri normadan kóbirek bolýy múmkin.
Al ońtústik-batys óńirlerde, sonyń ishinde Qyzylorda men Túrkistan oblystarynyń basym bóliginde, Mańǵystaýdyń ońtústik-shyǵysynda, Aqtóbe oblysynyń ońtústigi men Jambyl oblysynyń ońtústik-batysynda jaýyn-shashyn mólsheri normadan az bolýy yqtımal. Qarasha aıynda Soltústik Qazaqstan, Qostanaıdyń soltústik bóligi, Aqmola jáne Pavlodar oblystarynda jaýyn-shashyn mólsheriniń normadan joǵary bolýy boljanyp otyr.
Osy rette 7 qyrkúıekte Qazaqstannyń birqatar óńirinde daýyldy eskertý kúshinde bolady. Ulytaý men Qaraǵandy oblystarynda jeldiń ekpini sekýndyna 15-20 metrge deıin jetedi. Mańǵystaý, Atyraý jáne Batys Qazaqstan oblystarynda jańbyr, naızaǵaı, keı jerlerde burshaq kútiledi. Aqtóbe oblysynda kúndiz aýa temperatýrasy 35 gradýsqa deıin kóterilýi múmkin.
Ońtústik jáne ońtústik-shyǵys óńirlerde de aýa raıy qubylmaly bolady. Túrkistan men Jambyl oblystarynda jańbyr, naızaǵaı jáne qatty jel kútilse, Jetisý oblysynyń Alakól mańynda jel kúsheıedi. Almaty oblysynda joǵary jáne tótenshe órt qaýpi saqtalady.
Soltústik jáne shyǵys óńirlerde de órt qaýpi bar. Qostanaı, Soltústik Qazaqstan, Aqmola, Pavlodar, Abaı jáne Shyǵys Qazaqstan oblystarynyń keı aýdandarynda joǵary órt qaýpi boljanyp otyr. Qyzylorda oblysynda kúndiz shańdy daýyl soǵyp, jeldiń ekpini sekýndyna 15-20 metrge deıin kúsheıýi múmkin.
Sınoptıkterdiń boljamynsha, bıylǵy kúz jyly ári qubylmaly ótedi. Qyrkúıekte jazdyń jyly kúnderi áli de saqtalǵanymen, qazan men qarasha aılarynda da elimizdiń kóptegen óńirinde aýa temperatýrasy klımattyq normadan joǵary bolady dep kútiledi.
