Mas kúıinde tártip buzdy dep aıyptalǵan prokýror aqtalyp shyqty

AQTAÝ. KAZINFORM — Prokýror Erbolat Ábdirovke Ákimshilik quqyqbuzýshylyq týraly kodekstiń «Usaq buzaqylyq» baby boıynsha hattama toltyryldy. Oǵan qoǵamdyq orynda tártip buzdy dep aıyp taǵylǵanymen, sot isti toqtatty. 

Erbolat Ábdirovke qatysty is Aqtaý qalasy ákimshilik quqyqbuzýshylyq jónindegi mamandandyrylǵyn sotynda qaraldy.

Oǵan Ákimshilik quqyqbuzýshylyq týraly kodekstiń «Usaq buzaqylyq» baby, onyń ishinde qoǵamdyq oryndarda bylapyt sóıleý, jeke tulǵalarǵa zábirlep tıisý jáne aınalasyndaǵylarǵa qurmetpen qaramaý bóligi boıynsha qaraldy. Bul bap boıynsha kinási dáleldense 20 AEK kóleminde aıyppul salynady nemese 20 saǵatqa deıin qoǵamdyq jumysqa tartylady. Tipti 5-10 táýlik ákimshilik qamaqqa alynýy múmkin.

Іs materıalyna súıensek, Almaty qalalyq áýejaıy jelilik polıtsııa bóliminiń qyzmetkeri bıyl 28 shilde kúni Erbolat Ábdirovke qatysty hattama toltyrady. Hattamada Air Astana áýe kompanııasynyń Almaty-Astana baǵytyndaǵy KS955 reısi kezinde jolaýshy Erbolat Ábdirovtiń avtobýstaǵy jolaýshylarǵa tıisip, qoǵamdyq tártipti buzǵany týraly akt tapsyrǵany jazylǵan. 

Sot otyrysy kezinde Erbolat Ábdirov óz kinásin moıyndamady. Áýejaıdan ushaqqa tasymaldaıtyn avtobýsty qoǵamdyq kólik sanatyna jatqyzbaıtynyn aıtty. Bul arnaıy avtobýs bolyp esepteledi. Ózge jolaýshylardan, áýekompanııasy men polıtsııa qyzmetkerlerinen shaǵym túspegen. Ózin qalypty ustaǵanyn, qoǵamdyq tártipti buzbaǵanyn jetkizdi. Sondaı-aq sot otyrysy kezinde medıtsınalyq saraptama qorytyndysy usynylǵan. Onda onyń sóıleý máneri men syrt kelbetinde qoǵamdyq tártipti tuzatyndaı erekshelik baıqalmaǵany týraly jazylǵan. Sot otyrysy kezinde Erbolat Ábdirov isti toqtatýdy surady.

Al aǵaıyndy kýágerler Almatyǵa Qyzylordadan kelip, Astanaǵa jolǵa shyqqan. Áýejaıda Erbolat Ábdirovpen tanysyp, jerles bolǵan soń áńgimeleskenin aıtty. Ushaqqa deıin jetkizetin avtobýs ishinde shý bolmaǵanyn, eshkim eshkimge dóreki sóz aıtpaǵanyn, al Astanaǵa túskende polıtsııa kútip alyp, túsinikteme jazdyrǵanyn jetkizdi. Arada bir kún ótkennen soń jelilik polıtsııaǵa qaıta shaqyrtylyp, túsiniktemege qol qoıǵan, biraq oqymaǵan. Erbolat Ábdirov ózin urmaǵanyn, esh kiná artpaıtynyn aıtty.

Aqtaý qalasy ákimshilik quqyqbuzýshylyq jónindegi mamandandyrylǵyn sotynyń sýdıasy I. Dosetov Erbolat Ábdirovke qatysty isti ákimshilik quqyqbuzýshylyq quram bolmaǵan soń toqtatty. Qaýly kóshirmesin alǵan taraptar 10 kún ishinde Mańǵystaý oblystyq sotyna shaǵym túsire alady.

Aıta keteıik, Erbolat Ábdirov byltyr aqpan aıynda Aqtaý qalasynyń prokýrory bolyp taǵaıyndaldy.

Buǵan deıin habarlaǵanymyzdaı, Aqtaý qalasynyń prokýrory mas kúıinde tártip buzǵany úshin ustalǵan bolatyn.