Qazaqstanda qus sharýashylyǵy ónimderiniń ózindik quny Keden odaǵyndaǵy ózge elderden óte joǵary - Qus ósirýshiler odaǵynyń prezıdenti
ALMATY. 3 qarasha. QazAqparat /Erlik Erjanuly/ - Qus sharýashylyǵyn sýbsıdııalaý Qazaqstanǵa qaraǵanda Reseıde 2 ese, al Belarýs elinde 3-4 ese joǵary. Ony QR Qus ósirýshiler odaǵynyń prezıdenti Rýslan Sharıpov búgin QazAqparat tilshisine Almatydaǵy 6-shy Ortalyq Azııalyq halyqaralyq aýyl sharýashylyǵy kórmesi aıasynda ótken konferentsııa kezinde aıtty.
"Qazaqstanda asyl tuqymdy taýyq ósirilmeıdi. Qural-jabdyq shyǵaratyn zaýyttar da joq. Dári-dármektiń bári syrttan keledi. Azyq-túlikten de bıdaı men arpadan basqanyń bárin ózge elderden valıýtaǵa satyp alamyz. Sondyqtan bizdiń qus ósirýshilerdiń eti men jumyrtqasynyń ózindik quny Keden odaǵyndaǵy ózge elderden óte joǵary", - deıdi Rýslan Ismaıyluly. Onyń aıtýynsha, jumyrtqa men et óndirýdiń eki deńgeıi bar. Birinshisi, jańa tehnologııalardy qoldanyp óndiristi ozyq qural-jabdyqtarmen jabdyqtaǵandar. Ekinshisi, áli eski qural-jabdyqpen jumys istep júrgender. Máselen, birinshi deńgeıdegilerge sýbsıdııa 1 dana jumyrtqany shyǵarýǵa 2,6 teńge, ette 1 kelige 66 teńgeni quraıdy. Al ekinshi deńgeıdegilerde ol jumyrtqada 2 teńge, ette 60 teńge bolyp otyr.
Qazaqstan qazir jylyna 2,8 mıllıard dana jumyrtqa óndiredi. Ol ishki naryqty qamtamasyz etýge artyǵymen jetedi. Al taýyq etinen 105 myń tonna broler shyǵarýda. Ol suranystyń 46-47 paıyzyn quraıdy. Іshki naryqty tolyq qamtamasyz etý úshin 220-230 myń tonna taýyq eti kerek. Qazaqstannyń ımporttyq qus etine bergen kvotasy 110 myń tonna. QR Qus ósirýshiler odaǵy prezıdentiniń paıymdaýynsha, otandyq óndirisshiler aldaǵy 2-3 jylda bul olqylyqtyń ornyn toltyrýǵa múmkindigi bar. Qazir qus eti AQSh pen Brazılııadan ımporttalyp otyr. Al Keden odaǵy aýmaǵyndaǵy seriktes elderge keletin bolsaq Reseı jylyna 500-600 myń tonna taýyq etin syrttan alyp otyr. Tek kórshiles aýdandardyń óndirisshileri ony Qazaqstanǵa satý tıimdi bolǵandyqtan belgili bir kólemde elimizge ákep jatyr. Al ımporttyq jumyrtqa kólemi aıtarlyqtaı kóp. Reseı óz óndirisshilerin Qazaqstanǵa qaraǵanda 2 eseden astam sýbsıdııalap otyrǵanyna qaramastan baǵa onda birshama joǵary bolyp otyr. R. Sharıpovtyń sózine qaraǵanda, Qazaqstan óndiris ornyn jańartýǵa qolǵabys jasasa óndirisshilerdiń artyq ónimdi kórshi elderdiń naryǵyna shyǵarýǵa múmkindigi bar. Olar qazirdiń ózinde Qyrǵyzstan men Ózbekstanǵa shekteýli kólemde taýyq eti men jumyrtqany eksporttaı bastady.
