Qazaqstanda qurylysy aıaqtalmaı qalǵan 44 úleskerlik nysan 2012 jyly salynyp bitedi

Bul týraly búgin alqa májilisi barysynda QR Qurylys jáne turǵyn úı-kommýnaldyq sharýashylyǵy isteri agenttigi tóraǵasynyń orynbasary Nıkolaı Tıhonıýk málim etti.

Onyń aıtýynsha, bıyl 10 aıdyń ishinde 14 turǵyn úı paıdalanýǵa berilip, 3 848 úleskerdiń baspana máselesi sheshilgen. Jalpy 2007 jyldyń 4-toqsanynan - daǵdarys bastalǵan tustan búgingi ýaqytqa deıin, 62 myńnan astam úleskeri bar turalap qalǵan 450 turǵyn úı kesheniniń 410-y, ıaǵnı 58 myńǵa tarta úleskerdiń baspanasy salynyp bitti.

«Osylaısha, 2011 jyldyń qarasha aıyndaǵy jaǵdaı boıynsha, 44 úleskerlik nysandy aıaqtaý qajet. Onyń ishinde, ákimdikterdiń málimetterine qaraǵanda, 20 nysandy 2011 jyldyń sońyna deıin, qalǵan 24 nysandy 2012 jyly salyp bitirý kózdelýde», - dedi N. Tıhonıýk.

Agenttik derekterine sáıkes, atalmysh 44 nysannyń 16-sy (3091 úlesker) Astana qalasynda, 15-i (2709 úlesker) Almatyda, qalǵan 13-i (4002 úlesker) basqa óńirlerde ornalasqan.