Qazaqstanda qurylys júrgizý salasynda eurocode standarty engiziledi
ASTANA. QazAqparat - Qazaqstanda qurylys júrgizý salasynda budan bylaı eurocode standarty engizilmek. Bul týraly OKQ-da ótken baspasóz máslıhatynda QR Investıtsııalar jáne damý mınıstri Jeńis Qasymbek aıtty, dep habarlaıdy «QazAqparat» HAA tilshisi.
«Kemerovadaǵy bolǵan sońǵy qaıǵyly oqıǵa - bul qurylys normatıvteriniń, paıdalanýdyń jáne órt qaýipsizdigin saqtamaýdyń saldaryna baılanysty bolyp otyr. Halyqaralyq deńgeıdegi qurylys normasynyń atalmysh júıesine ótý mańyzdy», - dedi eurocode standarty týraly aıtqan mınıstr OKQ-da ótken baspasóz máslıhatynda.
Jeńis Qasymbektiń aıtýyna qaraǵanda, eurocode standartyna ótý jumysy Qazaqstanda qazirdiń ózinde bastalyp ketken.
«Biz qazir josparly túrde aýysyp kelemiz. Ótken jyly qurylys normalarynyń eurocode standarttary boıynsha úlken paketin qabyldadyq. Qazirdiń ózinde naqty jobalar barshylyq. Bálkim, ol jobalardyń sany asa kóp emes te shyǵar, sebebi olarmen qatarlas toqsanynshy jyldary keńestik standarttar bazasy boıynsha qabyldanǵan GOST bar», - dedi mınıstr.
Sonymen qatar, Jeńis Qasymbek standarttardyń ózgerýine baılanysty qurylys protsesiniń baǵasy qymbattap ketýi múmkin ekenin de joqqa shyǵarmady.
«Ol bizge ne beredi? Birinshiden, qurylys sapasynyń deńgeıi munda aıtarlyqtaı joǵary, talaptar qatań. Álbette, bul qurylystyń baǵasyna áserin tıgizýi de múmkin, sebebi munda talap bólek. Biraq, nátıjesinde bul sapasy joǵary turǵyn jáne ónerkásiptik ǵımarattarǵa qol jektizýge múmkindik beredi. Bul Qazaqstandaǵy qurylys mádenıetine sózsiz áserin tıgizedi», - dedi Jeńis Qasymbek.
