Qazaqstanda qurylys jumystary qańtar-qyrkúıek aılarynda 3,5%-ke artty
ASTANA. QazAqparat - 2017 jyldyń qańtar-qyrkúıek aılarynda Qazaqstanda qurylys jumystarynyń kólemi 2264,7 mlrd teńgeni qurady, bul 2016 jyldyń osy kezeńimen salystyrǵanda 3,5%-ke kóp degen sóz, dep habarlaıdy «QazAqparat» HAA Qazaqstan Respýblıkasy Ulttyq ekonomıka mınıstrliginiń Statıstıka komıtetine silteme jasap.
Esepti kezeńde qurylystaǵy eń kólemdi jumys avtomagıstraldar men joldarda oryndaldy, olardyń jalpy quny 502,2 mlrd teńgeni qurady, al ınjenerlik qurylystarda 387,1 mlrd teńgeniń, turǵyn úıler qurylystarynda 263,8 mlrd teńgeniń, óndiris ǵımarattarynda 233,9 mlrd teńgeniń jumysy atqarylǵan.
Qurylys-montajdaý jumystarynyń kólemi 0,4%-ke artyp, 1958,6 mlrd teńgeni qurady. Kúrdeli jáne aǵymdaǵy jóndeý jumystarynyń 2016 jyldyń osy kezeńimen salystyrǵandaǵy kólemi 37,1% jáne 20,6%-ke oryndaldy.
Ústimizdegi jyldyń qańtar-qyrkúıek aılarynda 22 626 jańa ǵımarattyń qurylysy aıaqtaldy, sonyń 20 787-si turǵyn úı bolsa, 1839-y áleýmettik nysandar. Atap aıtqanda, 56 mektep, 35 balabaqsha, 27 ambýlatorııalyq-emhana uıymdary jáne 1 aýrýhana paıdalanýǵa tapsyrylǵan.
