Qazaqstanda qurylys sapasy úshin derbes jaýapkershilik engiziledi
ASTANA. 20 maýsym. QazAqparat «Avtojoldar salasyn reformalaý týraly» jańa zań jobasynda elimizdegi avtomobıl joldaryn salý sapasyn qadaǵalaý jónindegi jaýapkershilikti kúsheıtý qarastyrylǵan.
Bul týraly QR KKM baspasóz qyzmetinen habarlandy.
Zań jobasynda respýblıkadaǵy avtojoldardy salý men rekonstrýktsııalaý barysyndaǵy tehnıkalyq jáne avtorlyq qadaǵalaý jaýapkershiligin kúsheıtý qarastyrylǵan. Aıtalyq, bul shara kelisimshart boıynsha sapanyń tehnıkalyq jaǵyn baqylaýǵa tıisti ınjenerlik kompanııalar men mamandarǵa tikeleı qatysty.
Zańnamaǵa usynylǵan túzetýler arqyly jóndeý jumystarynyń barlyq túrine, onyń ishinde aǵymdaǵy jáne ortasha jóndeý jumystaryn tıisti deńgeıdegi sapada oryndamaǵany úshin derbes jaýapkershilikti engizý kózdelgen.
Budan burynǵy zańnamada jol boıynda kúrdeli jóndeý jumystaryn nemese rekonstrýktsııa júrgizgen merdigerlerdiń ǵana jaýapkershiligi eskerilgen bolatyn.
Al, atalǵan zań jobasynda ýchaskede qurylys, rekonstrýktsııa nemese jóndeý jumystaryna qadaǵalaý júrgizetin ınjenerler tarapynan qandaı da bir zań buzýshylyq anyqtalǵan jaǵdaıda olardy ataýly attestattan aıyrý múmkindigi qarastyrylǵan. Sonymen birge ınjenerlik kompanııany tańdaý kezinde buryn halyqaralyq kelisimshart boıynsha jumys jasaǵan kompanııalarǵa basymdyq beriletin bolady.
Munyń syrtynda avtojol salý salasyna FIDIC-tiń negizgi qaǵıdattaryn engizý josparlanýda. Bul Injener-keńesshilerdiń halyqaralyq federatsııasy shyǵarǵan tıptik kelisimshart. Bul qaǵıdattar jol qurylysyn júrgizýde búkil álem boıynsha tabyspen qoldanylyp keledi.
Sonymen birge Kólik jáne kommýnıkatsııa mınıstrliginiń quzyretinde strategııalyq jáne aǵymdaǵy josparlaý, sondaı-aq qurylys sapasyn saraptaý fýnktsııalary qalatyn bolady. Ótken aptada QR Parlamenti Májilisiniń jalpy otyrysynda «Avtojoldar salasyn reformalaý týraly» jańa zań jobasy birinshi oqylymda maquldanǵanyn esterińizge salamyz.
Anyqtama: FIDIC Injener-keńesshilerdiń halyqaralyq federatsııasy. Negizgi qyzmeti halyqaralyq ınvestıtsııalyq-qurylys qyzmetine qatysýshylardyń qarym-qatynasyn retteý úshin kelisim sharttardyń tıptik sharttaryn ázirleý.
