Qazaqstanda qurylys materıaldary arzandaýy múmkin be

NUR-SULTAN. QazAqparat – Armatýra baǵasy jyl aıaǵyna deıin tonnasyna 500 myń teńgeden túsýi múmkin. Bul týraly Qazaqstan qurylysshylary qaýymdastyǵynyń tóraǵasy Vıktor Mıkrıýkov málim etti, dep habarlaıdy QazAqparat tilshisi.

«Memlekettik tapsyrystar aıasynda turǵyn úı salýshylar men jeke naryqta úı salyp júrgen kompanııalar koronavıýrs shekteýleri engizilgen kezden beri kúızelispen jumys istep jatyr dep aıtýǵa bolady. Áýeli maman tapshlyǵy boıynsha kúızelis bolǵan edi. Onyń artynan qurylys materıaldarynyń qymbatshylyǵy kúızelis týǵyzdy. Osynyń saldarynan shekteýler báseńdegen kezde qurylys materıaldaryna degen suranys birneshe ese ósti. Endi Reseı Federatsııasyna qarsy salynǵan sanktsııalardyń kúızelisi tónip tur. Bizdi ol kúızelis aınalyp ótpeıtini anyq», - dedi ol konferentsııada.

Aıtýynsha, qazir qurylystyń quny 10 paıyzdan artyq qymbattaǵan.

«Qurylystyń ózindik kúni qymbattap barady. Materıaldar orta eseppen 10-25% kóterildi. Qıyrshyq tas, armatýra sııaqty jekelegen pozıtsııalardy alyp qarasaq, 100% artyq qymbattaǵan. Armatýra baǵasy qalypqa kelip, tonnasyna 250 myń teńge bolady dep úmittenemiz. Biraq ázirge ol úmittiń oryndalatyn syńaıy joq», - dedi qaýymdastyq basshysy.

Sondaı-aq, ol qurylys materıaldarynyń arzandaý yqtımaldyǵy týraly pikir bildirdi.

«2021 jyly armatýra baǵasy tonnasyna 323 myń teńge bolatyn. Qazir ol 507 myń teńge. Jyl aıaǵyna qaraı baǵanyń túsýin kútip otyrmyz. Al beton baǵasy udaıy ósýde, tómendeıtin túri joq. Gaz-blok baǵasy jyl sońyna qaraı turaqty mánin kórsetetin shyǵar. Biraq materıaldyń bári jappaı arzandap, baspananyń sharshy metri arzandaıdy dep kútýdiń qajeti joq», - dedi Vıktor Mıkrıýkov.