Qazaqstanda qurylys kompanııalary nesıelerin keshiktirip tóleýde
ASTANA. QazAqparat - 2017 jyly Qazaqstanda qurylys salasy ókilderine usynylatyn qazaqstandyq bankterdiń nesıe qorjyndarynyń sapasy nasharlap keledi, dep habarlaıdy «QazAqparat» HAA energyprom.kz-ke silteme jasap.
Bul úrdis ásirese aǵymdaǵy jyldyń mamyr-shilde aılarynda baıqaldy. Tutas alǵanda, qańtar-shilde aılarynda qurylys salasyndaǵy merzimi ótken tólemdermen qyzmet kórsetiletin qaryz úlesi jyl basynda 11%-dan 16,4%-ǵa deıin ósti.
Alaıda qurylys salasyndaǵy nesıe qurylymdarynda qysqa qaryzdar nebári 18% quraıdy. Nesıe berýshilerdiń alańdaýshylyǵyn týǵyzatyn negizgi másele - saladaǵy uzynmerzimdik nesıelerdi tóleýdiń keshiktirilýi.
Bıylǵy jyldyń jeti aıynda uzaqmerzimdi qorjyndaǵy jumys istemegen nesıeler úlesi 8,7%-dan 13,7%-ǵa deıin ósti.
Qurylys salasyndaǵy qaryz qorjynynyń birden tómendegenin baıqaǵan nesıe berýshiler salany belsendi nesıeleýdi toqtatty: 2016 jyldyń shilde aıynyń sońyndaǵy somamen salystyrǵanda bir jylda qurylys kompanııalary qaryzdarynyń kólemi 4,6%-ǵa qysqardy. Qurylys kompanııalaryna uzaq merzimdi nesıe berý toqtatyldy, mundaı qaryzdar qorjynynyń kólemi bir jyl ishinde 7,8 paıyzǵa, 801,4 mlrd teńgege deıin qysqardy.
Qazaqstan ekonomıkasy men turǵyndarǵa usynylatyn barlyq nesıeler boıynsha tutas alǵanda, tóleý merzimi ótken qaryzdar kólemi 10,3%-dy quraıdy, onyń ústine jıyntyq qaryzdar qorjyny da aıtarlyqtaı tómendegen.
