Qazaqstanda qurylys kólemi 11,7 paıyzǵa ósti
NUR-SULTAN. QazAqparat - Qurylys kásiporyndary men uıymdarynyń 2020 jylǵy qańtar-naýryzda atqarǵan jumys kólemi 456,1 mlrd teńgeni qurady, dep habarlaıdy QazAqparat energyprom.kz-ǵa silteme jasap.
2020 jylǵy qańtar-naýryzda eldegi qurylys jumystarynyń kólemi 456,1 mlrd teńgeni qurady. Bul ótken jyldyń sáıkes kezeńimen salystyrǵanda 11,7 paıyzǵa kóp.
Olardyń aıtarlyqtaı bóligin qurylys-montaj jumystary alady, ıaǵnı 412,4 mlrd teńge. Al 23,3 mlrd teńge aǵymdaǵy jóndeýge, 20,3 mlrd teńge kúrdeli jóndeý jumystaryna ketedi.
Osy jyldyń 3 aıynda sheteldik qurylys uıymdarynyń qurylys jumystarynyń kólemi 17,3%, jeke menshik qurylys uıymdary- 82,7 paıyz, memlekettik qurylys uıymdary - 0,01paıyzdy qurady. Bir jyl buryn dál osy merzimde jeke qazaqstandyq qurylys kompanııalary qurylys jumystarynyń kólemi 85,9 paıyz, sheteldik qurylys kompanııalarynyń jumys kólemi - 14,1 paıyz, memlekettik qurylys kompanııalarynyń jumys kólemi - 0,04 paıyzdy quraǵan.
Qurylys jumystarynyń jalpy kólemindegi sheteldik uıymdardyń eń kóp úlesi Atyraý oblysyna tıesili (41,1%). Odan keıingi orynda Nur-Sultan qalasy (33,3%). Basqa aımaqtarda bul kórsetkish 10 paıyzdan aspaıdy.
