Qazaqstanda qurylatyn Quqyq qorǵaý organdary akademııasyna Túrkııa tájirıbesi paıdalanylady (FOTO)
ASTANA. QazAqparat - Bas Prokýrordyń orynbasary Jaqyp Asanov bastaǵan qazaqstandyq delegatsııa Túrkııanyń Ádil sot akademııasynyń jumysyn uıymdastyrý tájirıbesimen tanysý úshin jasaǵan sapary aıaqtaldy. Top quramynda Parlament depýtaty Nurlan Ábdirov, Prezıdent Ákimshiliginiń bólim meńgerýshisiniń orynbasary Alekseı Kalaıchıdı, Joǵarǵy Sottyń, Bas prokýratýranyń jáne birqatar oblystyq prokýratýranyń ókilderi boldy. Bul týraly QR Bas prokýratýrasynyń baspasóz qyzmetinen habarlandy.
Delegatsııanyń saparyna Túrkııa Respýblıkasy Úkimetiniń janyndaǵy Túrkııa yntymaqtastyq jáne úılestirý jónindegi agenttik (TIKA) pen Qazaqstannyń Túrkııa Respýblıkasyndaǵy elshiligi qoldaý kórsetken. Qazaqstandyq delegatsııa sapar barysynda Akademııa basshylyǵymen kezdesip, oqý orny qyzmetiniń negizgi baǵyttarymen tanysty. Túrkııalyq áriptester oqý mekemesiniń qurylymy, mundaǵy oqý isiniń erekshelikteri týraly jáne tyńdaýshylardyń sanattaryn arttyrý, ǵylymı-ádistemelik jáne materıaldyq-tehnıkalyq bazasy jaıynda áńgimelep berdi.
Aıta keterligi, Ádil sot akademııasy sýdıa nemese prokýror mamandyǵyn tańdaǵan árbir zańger bilim alýǵa mindetti, aıryqsha mártebege ıe bilim berý mekemesi bolyp tabylady. Mekeme álemniń 80-nen astam elderiniń oqý oryndarymen jáne quqyq qorǵaý organdarymen belsendi yntymaqtastyq ornatqan. Mundaǵy oqý baǵdarlamasy tyńdaýshylarǵa teorııalyq bilimdi prokýrorlyq jáne sýdıalyq jumystarmen is júzinde baılanystyra otyryp sińiredi. Dáris berý jumystaryn tájirıbeli prokýrorlar men sýdıalar júzege asyrady. Sapar barysynda Qazaqstannyń Túrkııa Respýblıkasyndaǵy elshisi Janseıit Túımebaev Ádil sot akademııasynyń prezıdenti Iylmaz Akchıl myrzaǵa, onyń eki eldiń ókiletti organdary arasyndaǵy ózara yqpaldastyqty damytýǵa qosqan aıryqsha úlesin atap kórsete otyryp, «Qazaqstan men Túrkııa arasyndaǵy dostyq pen yntymaqtastyqty damytqany úshin» estelik medalin tapsyrdy. «Sapar aıasynda jekelegen memlekettik organdardyń birinshi basshylarymen qyzmettik kezdesýler uıymdastyryldy. Atap aıtqanda Parlamenttiń Bas hatshysy Irfan Nezıroglýmen, Konstıtýtsııalyq sot tóraǵasynyń mindetin atqarýshy Býrhan Ýstýnmen, Qylmystyq jáne azamattyq ister boıynsha Joǵarǵy sot tóraǵasy Ismaıl Rýshtýmen, Joǵarǵy áskerı sot tóraǵasy Ahmet Zıkılımanmen, Bas Prokýror Mehmet Akardjamen, Bas áskerı prokýror Alı Ýzýnmen jáne Ádilet mınıstrligi men Joǵarǵy sot ókilderimen kezdesý barysynda qazaqstandyqtar Túrkııanyń zańnamalarymen jáne quqyqtyq júıesimen, ortalyq memlekettik organdardyń ókiletterimen jete tanysty. Kezdesý barysynda qabyldaýshy taraptyń ókilderi Qazaqstannyń qaryshtap damyp kele jatqandyǵyn joǵary baǵalap, sonymen qatar Elbasy Nursultan Nazarbaevtyń eki baýyrlas el dostyǵynyń nyǵaıyp, yntymaqtastyǵynyń artýyna qosyp jatqan eleýli eńbegin atap ótti. Túrkııanyń Ádil sot akademııasynyń oń tájirıbesi Qazaqstandaǵy Bas prokýratýranyń janynan qurylyp jatqan Quqyq qorǵaý organdary akademııasynyń qyzmetinde keńinen paıdalanylatyn bolady», delingen baspasóz baıanynda.
