Qazaqstanda kúrish qaýyzynan kremnıı kómirtekti nanokompozıt óndiriledi
ASTANA. KAZINFORM – QR Ǵylym jáne joǵary bilim mınıstrligi Ǵylym qorynyń qoldaýymen kúrish qaýyzynan kremnıı kómirtekti nanokompozıt óndirý jolǵa qoıylǵanyn málim etti.
Ǵylym qory basqarma tóraǵasynyń orynbasary Sultanbek Aımaqov kúrish qabyǵynan kremnıı kómirtekti nanokompozıt óndirisiniń І kezegin iske qosýǵa qatysty. Óndiris qýaty – jylyna 1500 tonna polıfýnktsıonaldy kremnıı kómirtegi materıaly. Jobany Ǵylym qorynyń qoldaýymen «Qazaqstan Respýblıkasynyń mıneraldyq shıkizatty keshendi qaıta óńdeý jónindegi ulttyq ortalyǵy» RMK iske asyryp jatyr.
Joba jetekshisi ıÝrıı Sýharnıkovtiń aıtýynsha, kúrish qaýyzy – kúrish óndirisiniń qaldyǵy.
«Kúrish qaýyzy kúrish salmaǵynyń 20 paıyzyna teń, ol quramynda mańyzdy elementter – kómirtegi men kremnıı bolǵandyqtan jańartylatyn shıkizat sanalady. Osy materıaldyń tabıǵı artyqshylyqtaryn paıdalana otyryp, biz nátıjesinde polıfýnktsıonaldy kremnıı kómirtekti nanokompozıt alatyn óńdeý tehnologııasyn ázirledik. Materıal rezeńke tehnıkalyq buıymdar men frıktsııalyq materıaldardy toltyrǵysh, kremnıı men ferroqorytpa alýǵa arnalǵan shıkizat retinde jumys isteıdi. Ony aýyl sharýashylyǵynda da paıdalanýǵa bolady», - dedi ol.
Sondaı-aq Sultanbek Aımaqov «Innovatsııalar jáne mıneraldyq shıkizatty keshendi qaıta óńdeý – ekonomıkany ártaraptandyrýdyń ózekti quramdas bólikteri» atty halyqaralyq ǵylymı-praktıkalyq konferentsııa jumysyna qatysyp, qordyń tehnologııalardy kommertsııalandyrý boıynsha júrgizip jatqan jumystary týraly habardar etti.
Ǵalymdardyń pikirinshe, kremnıı men kómirtektiń nanokompozıti lıtıı-ıondy batareıalarǵa qoldanýǵa bolady. Mysaly, Djordjııa tehnologııalyq ınstıtýtynyń mamandary lıtıı-ıondy batareıalardyń anodyn jasaý úshin kremnıı men kómirtektiń nanokompozıtin qoldanýdy usyndy. Olardyń pikirinshe, bul elektrondy qurylǵylardyń keń spektrinde qoldanylatyn batareıalardyń kórsetkishin edáýir jaqsartady.
