Qazaqstanda kúrish eksporty 25%-dan astam ósti
ASTANA. KAZINFORM – Qazaqstanda bıylǵy qańtar-tamyz aılarynda 145 myń tonna kúrish óndirildi. Bul ótken jyldyń sáıkes kezeńimen salystyrǵanda 18,6%-ǵa artyq, dep habarlaıdy Ulttyq statıstıka bıýrosy.
2025 jylǵy qańtar-tamyz aılarynda elimizdegi kúrish óndirisiniń kólemi 122,3 myń tonnany quraǵan.
Bıylǵy qańtar-shilde aılarynda ishki naryqta 70,5 myń tonna kúrish ótkizildi. Bul ótken jyldyń sáıkes kezeńimen salystyrǵanda 3,9%-ǵa joǵary.
Osy kezeńde kúrish eksporty da aıtarlyqtaı ósti. Qańtar-shilde aılarynda syrtqy naryqtarǵa jetkizilgen kúrish kólemi byltyrǵy 70,9 myń tonnadan 88,8 myń tonnaǵa deıin artyp, ósim 25,3%-dy qurady. Eksport quny 24,7 mln AQSh dollary deńgeıinde saqtaldy.
Qazaqstan kúrishin satyp alatyn negizgi elder qatarynda Aýǵanstan, Tájikstan, Reseı, Ózbekstan jáne Qyrǵyzstan bar.
– 2026 jylǵy qańtar-shilde aılarynda kúrish eksportynyń kólemi ımport kóleminen 18 ese joǵary boldy. Osy kezeńde kúrish ımporty ótken jyldyń sáıkes kezeńimen salystyrǵanda 70,7%-ǵa tómendedi, – delingen Ulttyq statıstıka bıýrosynyń málimetinde.
Importtyq jetkizilimder kólemi 16,7 myń tonnadan 4,9 myń tonnaǵa deıin, al onyń quny 9 mln AQSh dollarynan 3,3 mln AQSh dollaryna deıin qysqardy.
Qazaqstanǵa kúrish jetkizetin negizgi elder – Úndistan, Reseı, Pákistan, Taıland jáne Ózbekstan.
Aıta keteıik, buǵan deıin Qazaqstanda kúrish eksportyna qatysty shekteýler alynyp, otandyq óndirýshilerge ónimdi syrtqy naryqtarǵa erkin shyǵarýǵa múmkindik berilgeni habarlanǵan.
