Qazaqstanda qurma baǵasy qansha
Ramazan aıynda qurma dastarhanǵa qoıatyn negizgi taǵamǵa aınalady. Oraza ustaıtyn kez kelgen adam duǵa tilep, aýyzasharda aldymen qurma jeıdi. Kazinform agenttiginiń tilshisi Qazaqstandaǵy qurma baǵasyn salystyryp, birneshe surpy týraly aqparat jınady.
Qurma elimiz boıynsha Almaty qalasynda arzan. Qazir munda shaǵyn qoraptaǵy qurma baǵasy 620 teńgeden bastalyp, 1 300 teńgege deıin jetti. Al Semeı qalasynda baǵa 700-1 000 teńge, Túrkistanda 650-1 100 teńge aralyǵynda. Kókshetaý qalasynda qurma baǵasy 980 teńgeden bastalsa, Taldyqorǵanda 950 teńge jáne odan joǵary.
Elimizdiń astanasynda baǵa 900-1 400 teńge aralyǵynda bolsa, Aqtóbe qalasynyń tutynýshylary qurmany 1 000-1 200 teńgege satyp alyp júr. Al Pavlodarda baǵa odan da joǵary. Qoraptaǵy qurma baǵasy — 1 600-1 730 teńge.
Qaraǵandy men Jezqazǵanda ırandyq qurma baǵasy 800 teńgeden bastalyp, keı jerlerde 1 600 teńgege satylady. Atyraýda baǵasy — 1 200 teńge. Irandyq qurmany kelilep satyp alsa baǵa 3 500 teńge bolady. Qostanaı qalasynda Iran men Týnısten ákelingen qurma 800-1 500 teńgeden satyp jatyr. Al sapaly surpy 2 500-3 500 teńgege baǵalanǵan.
Jalpy elimizde kelilep satylatyn qurma baǵasy joǵary. Eń kóp taraǵany — Medjool surpy. Shymkent qalasynda onyń baǵasy 10 300-13 000 teńge bolsa, Qostanaıda 12 000-15 000 teńge. Al Qyzylorda qalasynda bul qurmaǵy 6 800 teńgege satyp alýǵa bolady. Petropavldaǵy baǵa 7 260 teńge, Taldyqorǵan men Aqtaýda 7 000 teńge, al Oral qalasynda shamamen 5 000 teńge. Túrkistanda «koroldik» qurmanyń kelisi 4 300 teńgeden bastalyp, 7 000 teńgege deıin jetti.
Sonymen birge qurmanyń Sukkari, Mabroom jáne Ajwa túrleri bar. Olardyń baǵasy óńirlerde 7 500 teńgeden bastalyp, 9 750 teńgege deıin jetedi. Al keıbiriniń baǵasy 9 000 teńge bolyp tur.
Qoryta kele Ramazan aıynda qurma baǵasy 600-700 teńgeden bastalyp, keıbir sapaly surpy 15 000 teńgege deıin jetedi. Baǵa qurmanyń qaıda óskenine, surpy men ónimniń kólemi jáne satý ádisine qaraı ózgerip otyrady.
Buǵan deıin Qazaqstan qalalaryndaǵy jylqy etiniń baǵasy týraly jazyldy. Sonymen birge kosmetolog qyzmetiniń qunyn bildik.