Qazaqstanda qurylysy problemaǵa aınalǵan neshe turǵyn úı kesheni bar

ASTANA. KAZINFORM – Ónerkásip jáne qurylys vıtse-mınıstri Qýandyq Qajkenov Qazaqstan aýmaǵyndaǵy problemaly turǵyn úılerdiń qurlysy jóninde túsinik berdi.

- Qazir 42 problemaly nysan boldy, onyń ekeýi bıylǵy birinshi toqsanda Atyraý jáne Shyǵys Qazaqstan oblystary aýmaǵynda tapsyryldy. Endi 40 nysan qaldy. 10-nan astamyn bıyl jol kartasy boıynsha aıaqtaımyz, al qalǵany 2026 jyly tapsyrylady. Óıtkeni keıbirinde sot protsesi áli jalǵasyp jatyr, - dedi Q. Qajkenov Senatta tilshiler suraǵyna jaýap bere otyryp.

Budan bólek ol úlesker qarjysyn zańsyz tartqan 99 nysan jaıynda aıtyp berdi.

- Osy 99 nysan jobalyq-smetalyq qujattamaǵa sáıkes zańnama aıasynda salynyp jatyr. Alaıda úleskerlerden aqsha tartýy zańsyz boldy. Keıbir nysandarda qurylys jalǵasyp keledi. Sonymen qatar, toqtap turǵan nysandar da bar, olar boıynsha sot protsesi aıaqtalmaǵan, - dedi vıtse-mınıstr.

Onyń sózine qaraǵanda, osyndaı zańsyz áreketterge jol bermeý úshin búgin Senatta maquldanǵan zań aıasynda tıisti jaýapkershilik kúsheıtiledi.

Budan buryn habarlanǵandaı, Búgin Senattyń jalpy otyrysynda «Keıbir zańnamalyq aktilerge turǵyn úı qurylysyna úlestik qatysý, avtomobıl joldary jáne múgedektigi bar adamdardy tasymaldaý jónindegi qyzmetterdi kórsetý máseleleri boıynsha ózgerister engizý týraly» Zańy eki oqylymda qaralyp, maquldandy.