Qazaqstanda qurylys jumystarynyń kólemi jarty jylda 4,1 trln teńgege jetti
ASTANA. KAZINFORM – Qazaqstanda 2026 jyldyń alǵashqy jartyjyldyǵynda qurylys jumystarynyń kólemi 4,1 trln teńgeni qurap, ótken jyldyń sáıkes kezeńimen salystyrǵanda 15,2%-ǵa ósti, dep habarlaıdy Ónerkásip jáne qurylys mınıstrligi.
Qazirgi tańda qurylys salasynyń eldiń jalpy ishki ónimindegi úlesi 6%-dy quraıdy.
2025 jyldyń qorytyndysynda Qazaqstandaǵy qurylys jumystarynyń kólemi 10,7 trln teńgege jetken. Bul 2024 jylǵy kórsetkishten 17,5%-ǵa joǵary.
– Mundaı ósimge aýqymdy ınfraqurylymdyq jobalardy iske asyrý, turǵyn úı qurylysynyń qarqyndy damýy jáne ınvestıtsııalyq belsendiliktiń artýy yqpal etti, – delingen mınıstrlik aqparatynda.
Salany odan ári damytýdaǵy mańyzdy qadamdardyń biri – Memleket basshysynyń tapsyrmasymen ázirlengen Qazaqstan Respýblıkasynyń Qurylys kodeksiniń kúshine enýi.
Jańa qujat qurylys sapasy men qaýipsizdigin arttyrýǵa, tsıfrlyq baqylaý tetikterin engizýge jáne memlekettik sáýlet-qurylys baqylaýyn jetildirýge baǵyttalǵan.
Kodekste qurylys nysandaryn paıdalanýdyń kepildik merzimin uzartý, jobalaý kezinde seısmıkalyq táýekelderdi mindetti túrde eskerý, qurylys uıymdaryn tsıfrlyq baqylaý jáne zań buzýshylyqtarǵa jedel den qoıý tetikteri qarastyrylǵan.
Otandyq qurylys materıaldaryn óndirý salasynda da ósim baıqalady. Qazirgi kezde ishki naryqtaǵy qazaqstandyq óndirýshilerdiń úlesi 70%-dan asady. Naryq suranysyn 3 myńnan astam kásiporyn qamtamasyz etip otyr.
– Bıyl jalpy quny 202,2 mlrd teńge bolatyn 48 ınvestıtsııalyq jobany iske asyrý josparlanǵan. Sonyń nátıjesinde 3,5 myńnan astam jańa jumys orny ashylady, – dep málimdedi vedomstvo.
Qurylys salasynda búginde 380 myńnan astam maman eńbek etedi. Olardyń qatarynda qurylysshylar, sáýletshiler, jobalaýshylar, ınjenerler jáne basqa da sala qyzmetkerleri bar.
Aıta keteıik, Zaısandaǵy áýejaı qurylysy aıaqtalýǵa taıap qaldy.
