Qazaqstanda qurylys salasyn baqylaıtyn biryńǵaı portal iske qosylady
ASTANA. KAZINFORM – Elimizde qurylys salasyndaǵy barlyq portal ıntegratsııalanyp, biryńǵaı aqparattyq júıe qurylady. Bul týraly Úkimet otyrysynda QR Premer-mınıstri Oljas Bektenov málim etti.
– Álemdik tájirıbe kórsetkendeı, osy salada tsıfrlyq sheshimderdi engizý qurylys jobalaryn iske asyrý merzimderin edáýir qysqartýǵa, shyǵyndardy aıtarlyqtaı azaıtyp, sybaılas jemqorlyq táýekelderin barynsha tómendetýge múmkindik beredi. Obektilerdi 3D modeldeý, tsıfrlyq qala qurylysy kadastrlary, jobalardy kelisýdiń elektrondyq platformalary sekildi tehnologııalar jáne kartografııa júıelerimen ıntegratsııalaý qurylys salasyndaǵy qalypty normaǵa aınalyp keledi. Memlekettik qala qurylys kadastryn, E-Qurylys portalyn jáne aqparattyq modelder bankin engize otyryp, qaǵaz júzindegi qujat aınalymynan túpkilikti tsıfrlyq protsesterge kóshemiz, - dedi Oljas Bektenov.
Sondaı-aq Úkimet basshysy elimizdegi qurylys salasyn tolyq baqylaıtyn biryńǵaı aqparattyq júıe iske qosylatynyn aıtty.
– Búgingi tańda ınjenerlik ınfraqurylymnyń 90 paıyzdan astamy tsıfrlandyryldy. Ruqsat qujattamasyn berý jáne jobalardy kelisý boıynsha memlekettik qyzmetterdi avtomattandyrý iske qosyldy. Egov arqyly qol jetkizýge bolatyn úlestik qurylystyń biryńǵaı tizilimi quryldy. Endi Memleket basshysynyń tapsyrmasy boıynsha osy jyldyń sońyna deıin biryńǵaı aqparattyq júıe iske qosylady. Ol qurylys salasyndaǵy qoldanystaǵy barlyq portaldy biryńǵaı platformada ıntegratsııalaıtyn bolady. Júıede «biryńǵaı tereze» qaǵıdaty boıynsha qala qurylysyn josparlaýdan bastap, obektilerdi paıdalanýǵa berýge deıingi ózekti aqparattardyń barlyǵy jınaqtalady, - dedi Premer-mınıstr.
Sondaı-aq ol júıeni iske qosý úshin barlyq óńir ákimdikterine osy jylǵy 1 qazanǵa deıin ınjenerlik jeliler shemalary men qala qurylysy qujattaryn qosa alǵanda, barlyq derekti tsıfrlandyrýdy aıaqtaýdy tapsyrdy.
Sondaı-aq budan bylaı qalalarda salynyp jatqan nysannyń áýelgi jobasynan jáne salyný maqsatynan aýytqymaýy úshin qurylys obektisiniń biregeı nómiri engiziledi.
Qazirdiń ózinde 89 qalada bastapqy ruqsat qujattaryn, tehnıkalyq sharttardy berý tsıfrlyq júıe arqyly iske asyrylyp jatyr.
Odan bólek 2026 jyly elimizde egjeı-tegjeıli josparlaý jobalaryn iske asyrýdy jasandy ıntellekt baqylap otyratyn bolady.