Qazaqstanda qurylys protsesiniń barlyq kezeńi onlaın rejımde baqylanady
ASTANA. KAZINFORM – Parlament Májilisiniń qaraýyna Qazaqstan Respýblıkasynyń Qurylys kodeksiniń jobasy men oǵan ilespe zań jobasy kelip tústi.
«Qurylys kodeksiniń jobasy men oǵan ilespe qujat jobasy Memleket basshysynyń Joldaýyn iske asyrý maqsatynda ázirlendi. Kodeks sáýlet ári qala qurylysy, sondaı-aq qurylys salasynda júıeli tetikterdi belgileýge, qurylys protsesiniń barlyq kezeńin onlaın rejımde baqylaýǵa múmkindik beretin eQurylys aqparattyq júıesin engizýge baǵyttalǵan», - dedi depýtat Nurtaı Sabılıanov Májilistiń jalpy otyrysynda.
Sonymen qatar, atalǵan qujat jobasynda qurylys salasyndaǵy ruqsattardyń biryńǵaı tizilimin bekitý, sáýlet ári qurylys qyzmetine qoǵamdyq baqylaýdy engizý eskerilgen.
«Sondaı-aq zań jobasynda qurylys sapasyn arttyrý, qurylys nysandaryn paıdalanýdyń kepildik merzimin 2 jyldan 5 jylǵa deıin ulǵaıtý qarastyrylǵan. Májilistiń Ekonomıkalyq reforma jáne óńirlik damý komıteti atalǵan qujat jobalary boıynsha qorytyndy ázirleýge daıyn», - dedi Májilis depýtaty.
