Qazaqstanda qurylys materıaldarynyń ımportyna shekteý engizildi
ASTANA. KAZINFORM – Qazaqstanda úshinshi elder arqyly tsement, gıpsokarton, tabaqty shyny, tas buıymdary jáne qurǵaq qurylys qospalaryn ımporttaýǵa shekteý engizildi. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev málim etti.
Mınıstrdiń aıtýynsha, qabyldanǵan sharalar otandyq óndiris kólemin arttyrýǵa jáne ishki naryqtaǵy baǵa turaqtylyǵyn saqtaýǵa múmkindik berdi.
– Basqa elder arqyly tsement, gıpsokarton, shyny, tas – buıymdary men qurǵaq qurylys qospalaryn ımporttaýǵa shekteýler engizildi. Qabyldanǵan sharalar ishki naryqtaǵy baǵa deńgeıine keri áser etpeı, otandyq óndiris kóleminiń artýyna yqpal etti, – dedi Ersaıyn Naǵaspaev.
Sonymen qatar mınıstr ishki naryqty turaqty qamtamasyz etý maqsatynda mıneraldy tyńaıtqyshtar eksporty lıtsenzııalanǵanyn atap ótti. Onyń nátıjesinde otandyq fermerler mıneraldy tyńaıtqyshtardy kelisilgen turaqty baǵamen alyp jatyr.
Budan bólek, metallalom aınalymyn retteý baǵytyndaǵy jumystar jalǵasyp jatyr. Bul qara metallýrgııany damytýǵa, bolattyń jańa markalaryn ıgerýge, sondaı-aq avtomobıl jasaý, mashına jasaý jáne qurylys salalaryna qajetti ónim óndirisin keńeıtýge múmkindik beredi.
Aıta keteıik, ulttyq taýarlar katalogyna 30 mln jýyq jazba engizildi.
