Qazaqstanda qurylys qarqyny artty: qaı óńirler kósh bastap tur?
ASTANA. KAZINFORM – Qazaqstanda 2026 jylǵy qańtar-qazan aılarynda qurylys jumystarynyń kólemi ótken jyldyń sáıkes kezeńimen salystyrǵanda 13,1%-ǵa artty.
Respýblıka boıynsha oryndalǵan qurylys jumystarynyń 89,5%-y jeke qurylys uıymdaryna, 9,8%-y sheteldik kompanııalarǵa, al 0,7%-y memlekettik uıymdarǵa tıesili.
Qurylys jumystary kóleminiń artýyna, negizinen, ımarattardy salý jáne jóndeý jumystarynyń 15,8%-ǵa ósýi áser etken.
Oryndalǵan qurylys jumystarynyń qurylymynda avtomobıl joldary, temirjoldar men metro qurylysy eń úlken úlesti – 25,4%-dy qurady. Odan keıin turǵyn emes ǵımarattar qurylysy – 21,5% jáne turǵyn úıler qurylysy – 12,6%.
– Aýmaqtyq bólinisinde respýblıkanyń on segiz óńirinde qurylys jumystary kóleminiń ulǵaıýy baıqalady. Edáýir ósý Ulytaý (2,3 ese), Qyzylorda (30,5%), Atyraý (25,7%) jáne Pavlodar (23,8%) oblystarynda, Almaty qalasynda (23,1%), Túrkistan (20,6%), Shyǵys Qazaqstan (15,5%), Batys Qazaqstan (15,4%), Aqtóbe (14,2%) jáne Abaı (13,1%) oblystarynda jáne Astana qalasynda (11,8%) baıqalady, – delingen statıstıkalyq aqparatta.
Bıylǵy on aıda paıdalanýǵa berilgen jańa nysandardyń jalpy alańy 18 mln 316,3 myń sharshy metrge jetti.
Al paıdalanýǵa berilgen turǵyn úılerdiń jalpy alańy ótken jyldyń sáıkes kezeńimen salystyrǵanda 2,1%-ǵa ulǵaıyp, 14 mln 919,8 myń sharshy metrdi qurady.
Onyń ishinde 9 mln 643,3 myń sharshy metri kóppáterli turǵyn úılerge, 5 mln 212,3 myń sharshy metri jeke úılerge tıesili.
Turǵyn úılerdiń basym bóligin, ıaǵnı 14 mln 178,1 myń sharshy metrin nemese 95%-yn jeke qurylys salýshylar paıdalanýǵa bergen. Sonyń ishinde halyqtyń óz kúshimen salǵan turǵyn úıleriniń jalpy alańy 5 mln 648,1 myń sharshy metr boldy.
Óńirler arasynda turǵyn úı qurylysynyń edáýir kólemi Almaty oblysynda tirkeldi. Munda 1 mln 107,5 myń sharshy metr turǵyn úı paıdalanýǵa berilip, ósim 16,9%-dy qurady.
Túrkistan oblysynda 988,5 myń sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 6,2%-ǵa kóp.
Qyzylorda oblysynda 804,1 myń sharshy metr (+4,9%), Aqtóbe oblysynda 760,8 myń sharshy metr (+2,2%), Jambyl oblysynda 588,3 myń sharshy metr (+0,4%) turǵyn úı paıdalanýǵa berildi.
Budan bólek, 2026 jylǵy qańtar-qazan aılarynda elimizde bilim berý jáne densaýlyq saqtaý salasynda birqatar áleýmettik nysan iske qosyldy.
Atap aıtqanda, 22 610 oqýshy ornyna arnalǵan 44 jalpy bilim beretin mektep, 5 437 oryndyq 37 mektepke deıingi uıym paıdalanýǵa berildi.
Sondaı-aq bir aýysymda 328 adam qabyldaýǵa arnalǵan 9 ambýlatorııalyq-emhanalyq uıym iske qosylyp, aýrýhanalarda qosymsha 120 tósek-oryn paıdalanýǵa berildi.
Aıta keteıik, buǵan deıin Qazaqstanda 2026 jyldyń alǵashqy toǵyz aıynda qurylys jumystarynyń kólemi 11,5%-ǵa ósip, 7,8 trln teńgeden asqany habarlanǵan edi. Osy kezeńde 13,2 mln sharshy metr turǵyn úı paıdalanýǵa berilgen.