Qazaqstanda qurylys qarqyny artty: 9 aıda 7,8 trln teńgeniń jumysy oryndaldy
ASTANA. KAZINFORM — Qazaqstanda 2026 jyldyń alǵashqy toǵyz aıynda qurylys jumystarynyń kólemi 11,5%-ǵa ósip, 7,8 trln teńgeden asty. Osy kezeńde paıdalanýǵa berilgen turǵyn úı kólemi de 2,7%-ǵa ulǵaıyp, 13,2 mln sharshy metrge jetti. Bul týraly Ulttyq statıstıka bıýrosy málim etti.
Stat bıýronyń málimetinshe, bıylǵy jylǵy qańtar-qyrkúıekte qurylys jumystarynyń kólemi 2025 jylǵy osy kezeńmen salystyrǵanda 11,5%-ǵa ulǵaıyp, 7 812,3 mlrd teńgeni quraǵan. Ósim ǵımarattar men qurylystardy salý jáne jóndeý jumystary kóleminiń 14,7%-ǵa artýyna baılanysty boldy. Qurylys jumystarynyń jalpy kóleminde jeke qurylys uıymdarynyń úlesi 89%, sheteldik uıymdardyń úlesi 10,3%, memlekettik uıymdardyń úlesi 0,7% qurady.
Qurylys jumystarynyń basym bóligi avtomobıl jáne temirjoldar men metro salýǵa baǵyttalǵan. Bul salanyń jalpy kólemindegi úlesi 25%-dy quraıdy. Turǵyn emes ǵımarattar qurylysynyń úlesi – 21,5%, al turǵyn úıler qurylysy 12,6%-dy qurady.
Óńirlik bóliniste respýblıkanyń 17 óńirinde qurylys jumystary kóleminiń ulǵaıýy baıqalady. Eń joǵary ósim Ulytaý oblysynda (2,4 ese), Qyzylorda oblysynda (31,5%), Shymkent qalasynda (25,4%), Atyraý oblysynda (22,2%), Pavlodar oblysynda (18,8%), Almaty qalasynda (18,1%), Túrkistan oblysynda (17%), Shyǵys Qazaqstan oblysynda (15,2%), Aqtóbe oblysynda (12,3%), Abaı oblysynda (11,5%), Almaty oblysynda (11%) jáne Astana qalasynda (11,1%) tirkeldi.
2026 jylǵy qańtar-qyrkúıekte paıdalanýǵa berilgen jańa obektilerdiń jalpy alańy 16 348,9 myń sharshy metrdi qurady.
Paıdalanýǵa berilgen turǵyn úıdiń aýdany 2025 jylǵy qańtar-qyrkúıekpen salystyrǵanda 2,7%-ǵa ulǵaıyp, 13 197,7 myń sharshy metrdi qurady. Onyń ishinde 8561,5myń sharshy metr – kóp páterli jáne 4 592,2myń sharshy metr – jeke úıler.
Aıta keteıik, Qazaqstanda turǵyn úı sapasynyń biryńǵaı standartyn engizý usynyldy.
