Qazaqstanda qurylys armatýrasynyń óndirisi eki esege artady
QARAǴANDY. KAZINFORM – Qazaqstan metallýrgııa salasynda óndiristik áleýetin kúsheıtip, ımportqa táýeldilikti azaıtýǵa jáne ishki óndiristi damytýǵa basymdyq berip otyr. Saladaǵy jańa joba qurylys materıaldary naryǵyndaǵy eldiń pozıtsııasyn aıtarlyqtaı nyǵaıtýdy kózdeıdi.
Qazaqstanda óndiristik bazany nyǵaıtýǵa jáne ishki naryqty strategııalyq mańyzy bar ónimdermen qamtamasyz etýge baǵyttalǵan iri ındýstrııalyq jobalardy júzege asyrý jalǵasyp jatyr. Osy baǵyttaǵy mańyzdy qadamdardyń biri – 2025 jyly Qarmet kompanııasy bastaǵan jańa sorttyq ılemdeý stanynyń qurylysy.
Bolashaq óndiristiń jobalyq qýaty jylyna 539 myń tonnadan astam daıyn metall prokatyn quraıdy. Bul qurylys armatýrasyn óndirý kólemin edáýir arttyryp qana qoımaı, sorttyq prokatqa degen ishki suranysty tolyq qamtamasyz etýge múmkindik beredi.
Jobanyń tehnologııalyq seriktesi – metallýrgııalyq kásiporyndardy jobalaý, salý jáne jańǵyrtý salasynda álemdik deńgeıde tanylǵan kóshbasshylardyń biri sanalatyn Capital Engineering & Research Incorporation Limited (CERI) ınjınırıngtik kompanııasy. Áriptestik jobany tolyq tsıklde iske asyrýdy kózdeıdi – jobalyq qujattamany ázirleýden bastap, jabdyqtardy jetkizý, montajdaý jáne iske qosý-jóndeý jumystaryna deıin.
Bul jobany iske asyrý Qazaqstannyń ónerkásiptik táýelsizdigin qalyptastyrýdaǵy mańyzdy kezeń retinde qarastyrylady. Jańa stan iske qosylǵannan keıin metall ónimderiniń ımportyna táýeldilik aıtarlyqtaı qysqaryp, ulttyq ekonomıkanyń syrtqy syn-qaterlerge tózimdiligi artady dep kútilip otyr.
Jobany júzege asyrýda sapa men tehnologııalyq talaptardy saqtaý basty nazarda. Mindetterdi oryndaý úshin CERI Qytaı men TMD elderinde jobalardy iske asyrý tájirıbesi dáleldengen halyqaralyq merdigerlerdi tartady. Bul barlyq kezeńde jumystyń joǵary deńgeıde oryndalýyn qamtamasyz etedi.
– 2025 jyldan bastap Qarmet metallýrgııalyq kombınat aýmaǵynda jańa sorttyq prokat stanynyń qurylysyn júzege asyryp keledi. Búginde biz bas seriktesimiz – CERI kompanııasymen birlesip, tseh qurylysyna qajetti jabdyqtar men materıaldardyń negizgi jetkizýshilerin anyqtadyq. Qajetti kólem, jabdyqtardy óndirý jáne jetkizý kestesi bekitildi. Tsehty osy jyly paıdalanýǵa berý josparlanyp otyr, - dep bólisti Qarmet kompanııasynyń kúrdeli qurylys jónindegi dırektory Alekseı Sıdorenko.
Qazirgi ýaqytta taraptar negizgi jabdyqtardy jetkizý boıynsha kelisimderge qol jetkizdi. Sonymen qatar óndiris, logıstıka jáne montaj jumystarynyń kesteleri kezeń-kezeńimen pysyqtalýda. Bul barlyq úderisti úılestirip, yqtımal táýekelderdi barynsha azaıtýǵa múmkindik beredi.
Jumystyń taǵy bir mańyzdy baǵyty – tehnıkalyq sheshimderdi óndiristik alańnyń erekshelikteri men qoldanystaǵy ınfraqurylym talaptaryna beıimdeý. Mundaı tásil jańa óndiristi qoldanystaǵy ónerkásiptik júıege tıimdi kiriktirýge jaǵdaı jasaıdy.
Joǵary tehnologııalyq óndirýshilerdi tartý jáne jobany júzege asyrýdyń barlyq kezeńinde qatań baqylaý júrgizý Qarmet kompanııasynyń jaýapkershilik deńgeıiniń joǵary ekenin kórsetedi. Nátıjesinde jańa óndiris tabysty iske qosylyp qana qoımaı, eldiń metallýrgııa salasyna uzaq merzimdi oń áserin tıgizedi dep kútilip otyr.
Sarapshylardyń pikirinshe, mundaı jobalar turaqty ónerkásiptik ósimniń negizin qalyptastyryp, jańa jumys oryndaryn ashady jáne Qazaqstannyń eksporttyq áleýetin arttyrady. Bolashaqta sorttyq prokat stanynyń iske qosylýy el ishinde tolyq tsıkldi metallýrgııalyq óndiristi qalyptastyrý jolyndaǵy mańyzdy qadam bolmaq.
