Qazaqstanda kúrdeli neırohırýrgııalyq operatsııalarǵa qoljetimdilik artady
ASTANA. KAZINFORM — Densaýlyq saqtaý mınıstri Aqmaral Álnazarova Astanadaǵy Ulttyq neırohırýrgııa ortalyǵyna baryp, elimizde neırohırýrgııa salasy úshin alǵash ret salynyp jatqan gıbrıdti operatsııalyq bólmeni qurý jobasynyń iske asyrylý barysymen tanysty, dep habarlaıdy DSM baspasóz qyzmeti.
Jobany iske asyrý kezeńderi, jańa nysannyń tehnologııalyq parametrleri men múmkindikteri týraly «Ulttyq neırohırýrgııa ortalyǵy» AQ Basqarma tóraǵasy Serik Aqsholaqov baıandady.
— Gıbrıdti neırohırýrgııalyq operatsııalyq bólmeni qurý — Qazaqstanda zamanaýı neırohırýrgııany damytýdyń mańyzdy qadamy. Bul joba bir operatsııalyq keńistikte mıkrohırýrgııa men endovaskýlıarlyq hırýrgııanyń múmkindikterin biriktirýge, asqyný qaýpin azaıtýǵa jáne mı qantamyrlary men isik patologııalarynyń eń kúrdeli túrlerimen aýyratyn patsıentterdi emdeý nátıjelerin edáýir jaqsartýǵa múmkindik beredi, — dedi ol.
Jobanyń sheńberinde mı qantamyrlary aýrýlary, isikter, qan quıylýlar, fýnktsıonaldyq buzylystar jáne ózge de kúrdeli patologııalar kezinde qoldanylatyn joǵary tehnologııaly neırohırýrgııalyq aralasýlardyń keń spektrin oryndaý josparlanyp otyr.
Gıbrıdti operatsııalyq bólmelerdi engizý kúrdeli neırohırýrgııalyq aralasýlarǵa qoljetimdilikti arttyryp, kezektilikti azaıtýǵa sózsiz yqpal etedi. Mundaı hırýrgııa formaty patsıentti aýystyrmaı jáne narkoz ýaqytyn uzartpaı, birneshe kúrdeli operatsııany bir mezette oryndaýǵa múmkindik beredi, bul aralasýdyń dáldigi men qaýipsizdigin arttyrady.
Atalǵan operatsııalyq bólmeni iske qosý otandyq neırohırýrgııany jańa deńgeıge kóteredi. Ol elimizde buryn qoljetimsiz bolǵan aralasýlardy júrgizýge jol ashyp, kóp kezeńdi operatsııalardyń sanyn qysqartady, ári mı qantamyrlarynyń kúrdeli aýrýlaryn emdeý kezinde asqyný qaýpin tómendetedi.
Gıbrıdti neırohırýrgııalyq operatsııalyq bólmeni paıdalanýǵa berý 2026 jyldyń jazyna josparlanyp otyr.
Ortalyqqa kelgen mınıstr patsıenttermen áńgimelesip, emdeý sapasy men emdeýge jatqyzý jaǵdaılary týraly surastyrdy.
Patsıentter dárigerler men meıirgerlerdiń joǵary biliktiligine jyly pikir bildirip, mindetti áleýmettik medıtsınalyq saqtandyrý (MÁMS) júıesi sheńberinde em qabyldap jatqanyn, emdeýge jatqyzý úderisi esh qıyndyqsyz uıymdastyrylǵanyn jetkizdi.
Buǵan deıin Qazaqstanda qyzylshaǵa qarsy profılaktıkalyq jáne epıdemııaǵa qarsy sharalar kúsheıtilgenin jazǵan edik.