Qazaqstanda qurbandyqqa shalatyn qoı baǵasy qansha
ASTANA. KAZINFORM — Qurban aıt merekesine sanaýly kún qaldy. Búginde elimizdiń óńirlerinde qurbandyqqa shalatyn mal baǵasy belgili boldy. Sonyń ishinde qoıdyń eń arzany men qymbaty arasyndaǵy aıyrmashylyq 140 myńǵa jetti, dep habarlaıdy Kazinform tilshisi.
Qurban aıt — musylmandardyń eń ulyq merekesi. Bul meıirim men izgiliktiń, jomarttyqtyń sımvoly. Qurbandyq shalyp, maldyń etin otbasy, týǵan-týys jáne az qamtylǵandar arasynda bóledi. Mereke aldynda Qazaqstan óńirlerinde qurbandyqqa shalatyn qoı baǵasy belgili boldy.
Elimiz boıynsha birneshe qalada baǵa ózgege qaraǵanda tómen. Aqtóbe, Qaraǵandy, Oral men Shymkent qalalarynda baǵa 60 myń teńgeden bastalady. Al Almaty, Aqtaý, Jezqazǵan, Taldyqorǵan, Túrkistan men Taraz qalalarynda 70 myń teńge jáne odan joǵary.
Óńirlerdiń kóbinde baǵa 80 000 — 140 000 teńge aralyǵynda. Petropavlda qoı baǵasy 75 000 — 120 000 teńge, Kókshetaýda 80 000 — 120 000 teńge, al Qyzylordada 80 0000 — 110 000 teńge aralyǵynda bolsa, Óskemende baǵa 130 myń teńgege, Qostanaıda 150 myń teńgege jetedi.
Elimizdiń astanasynda qurbandyqqa shalynatyn qoı baǵasy joǵary. Astana qalasynda 90 000 — 170 000 teńge aralyǵynda. Sonymen birge Semeı men Qonaev qalalarynda da baǵa 90 000 — 140 000 jáne 90 000 — 120 000 teńge aralyǵynda.
Baǵa elimizdiń batysy men ońtústik óńirlerinde de joǵary. Atyraý qalasynda qoı baǵasy 120 000 teńgeden bastalyp, 150 000 teńgege deıin kóterilgen. Al Pavlodarda 180 myń teńgege, Jezqazǵanda 160 myń teńgege deıin jetti.
Elimiz boıynsha qoı baǵasy Túrkistan qalasynda qymbat. Munda baǵa 70 000 teńgeden bastalyp, 200 000 teńgege jetken. Satýshylar baǵaǵa suranystyń artýy, sonymen birge qoıdyń jasy men tuqymy, qaıda baǵylǵany áser etkenin aıtady. Sarapshylardyń aıtýynsha, mereke jaqyndaǵan saıyn baǵa da ózgerýi múmkin. Baǵaǵa suranys, bazardaǵy mal sany men logıstıka jáne qurbandyq shalatyn orynnyń bolýy áser etedi.
Buǵan deıin Kazinform qazaqstandyqtardyń tabıǵat aıasynda tynyǵýǵa qansha jumsaıtynyn bildi.
