Qazaqstanda qurastyrylǵan suranysy joǵary kólikter tizimi jarııalandy
NUR-SULTAN. QazAqparat - 2020 jyldyń І jartyjyldyǵynda Qazaqstanda 235,4 mlrd teńgege 32 myńnan astam avtokólik shyǵaryldy, dep habarlaıdy QazAqparat tilshisi.
«QazAvtoÓnerkásip» Qazaqstannyń avtomobıl salasy kásiporyndary odaǵynyń málimetinshe, 6 aıdyń ishinde elimizde jeńil, júk kólikterin, avtobýstardy, arnaıy mashınalar men tirkemelerdi qosa alǵanda jalpy quny 235,4 mlrd teńge bolatyn 32 059 avtokólik qurastyrylǵan. Naqty mánde shyǵarylǵan kólik túrleriniń kólemi ótken jylǵy kórsetkishten 55,6 paıyzǵa joǵary bolyp otyr.
Esepti kezeńde elimizde 27 867 jeńil kólik qurastyrylyp, ósim 48,6 paıyzǵa jetti. 713 avtobýs qurastyryldy. Júk kóligin qurastyrý 3,5 esege artyp, 2 974-ke jetti. 131 arnaıy tehnıka men 374 tirkeme shyǵaryldy.
Respýblıka turǵyndary jergilikti óndiristen shyqqan kólikterdi satyp alýǵa 183,8 mlrd teńge jumsady. Bul bir jyl burynǵy kórsetkishten 51,4 paıyzǵa joǵary. Jyl basynan beri elimizdiń kásiporyndarynda qurastyrylǵan kólikterdiń ishinde Lada (7 922), Hyundai (6792), Ravon (3395), KIA (3080) jáne Chevrolet (596) markalaryna suranys joǵary. Bul qatarǵa JAC (332), UAZ (242) jáne Skoda (202) kólikteri de kirip otyr.
2020 jyldyń qańtar-maýsymynda 4 775 avtomobıldi jeńildetilgen avtonesıe memlekettik baǵdarlamasyna qatysýshylar satyp alǵan.
