Qazaqstanda qurastyrylatyn 500 kombaın Belarýske jóneltiledi
QOSTANAI. QazAqparat - Sheteldik kásiporyndardyń qostanaılyq aýylsharýashylyq tehnıkalaryna suranysy mol. Bul týraly oblystyq ekonomıka jáne bıýdjetti josparlaý basqarmasynyń basshysy Erlan Spanov málim etti, dep habarlaıdy QazAqparat tilshisi.
2018 jyldyń basynda Qazaqstannan Belarýs Respýblıkasyna 500 kombaın jóneltiledi. Bul ekijaqty taraptyń kelisimi arqyly júzege asyrylyp otyr.
«Bıyl kólik qurastyrýǵa 67,5 mlrd teńge bólindi. Qarjynyń 23,4%-y óńdeý sektoryna jumsaldy. Bul kórsetkish 2016 jyly nebári 12,9% bolǵan. Qostanaılyq mamandardyń qatysýymen barlyǵy 3,5 myń jeńil avtokólik shyǵaryldy. Buǵan qosa 296 IVECO avtobýsy satylymǵa shyqty», - dedi Erlan Spanov.
Basqarma basshysynyń aıtýynsha, memlekettik satyp alý konkýrstary men memlekettik-jekeshelik áriptestik aıasyndaǵy jobalardy júzege asyrý nátıjesinde artylǵan 2 mlrd 123 mln teńge áleýmettik saladaǵy biraz máseleni sheshýge septigin tıgizedi. Máselen, únemdelgen qarajattyń basym bóligi, ıaǵnı 1 mlrd 69 mln teńge ortalyq stadıonnyń kúrdeli jóndelýine, al 500 mln teńge úsh ákimshilik ǵımaratty retke keltirýge jaratylady. Sondaı-aq, polıtseılerge arnalǵan portatıvti beınebaqylaý qurylǵylaryn satyp alýǵa 249 mln teńge josparlanǵan.
Únemdelgen qarajattyń biraz bóligi «ıÝbıleınyı» shaǵynaýdanynda salynatyn turǵyn úılerdiń smetalyq-jobalyq qujattaryna ketedi. Artylǵan qarajat turǵyn úılerdiń ınjenerlik-kommýnıkatsııalyq júıelerin jańartýǵa da jumsalmaq.
