Birneshe óńirde quramynda altyny bar kendi zańsyz óndirý áreketi toqtatyldy

ASTANA. KAZINFORM — Іshki ister mınıstrligi men Ulttyq qaýipsizdik komıtetiniń qyzmetkerleri Bas prokýratýranyń úılestirýimen Abaı, Jetisý, Shyǵys Qazaqstan jáne Túrkistan oblystarynda altyn quramdy materıaldardy zańsyz óndirý jáne óńdeýmen aınalysqan bes kásiporynnyń qyzmetin toqtatty, - dep habarlaıdy Polisia.kz.

 - Tekserý barysynda bul kompanııalardyń tek geologııalyq barlaý júrgizýge lıtsenzııalary bola tura, arnaıy tehnıka men óndiristik jabdyqtardy paıdalana otyryp, altyn quramdy kendi keń kólemde zańsyz óndirgeni anyqtaldy.​

Júrgizilgen tintý sharalary barysynda 6 700 tonnadan astam altyn quramdy ken, 300 tonna suıyq ken (pýlpa), 120 tonna selıtra, sondaı-aq jarylǵysh zattar men detonatorlar tárkilendi. Sonymen qatar oqıǵa oryndarynan 45 birlik arnaıy tehnıka alyndy.​ Polıtsııaǵa 62 adam, onyń ishinde birneshe JShS dırektorlary men quryltaıshylary jetkizildi.​

Anyqtalǵan zań buzýshylyqtar boıynsha quramynda baǵaly metaldar bar shıkizattyń zańsyz aınalymy faktileri boıynsha bes qylmystyq is tirkeldi. Memleketke asa iri kólemde zalal keltirilgeni anyqtaldy, - dedi ІІM uıymdasqan qylmysqa qarsy kúres departamentiniń ókili Qýandyq Alpys.

Aıta keteıik, «Maıqaıyńaltyn» kenishinde qaza tapqan tórt qutqarýshynyń isi boıynsha aldyn ala sot otyrysy bastalady.