Qazaqstanda kúnkóris mınımýmy 12 paıyzǵa ósti
NUR-SULTAN. QazAqparat – Qazaqstanda 2020 jyldyń qańtarynda jan basyna eseptegende kúnkóris mınımýmy 30 myń teńgege jetip, 11,6 paıyz ósimdi kórsetip otyr, dep habarlaıdy QazAqparat tilshisi finprom.kz zertteýine silteme jasap.
Zertteýge súıensek, týra bir jyl burynǵy kórsetkish 26,9 myń teńge bolyp, jyldyq ósim 4 paıyzdy quraǵan.
«Bıyl qańtar aıynda taýarlar men qyzmetterdiń baǵasy ótken jyldyń qańtar aıymen salystyrǵanda 5,6 paıyzǵa ósti. Onyń ishinde azyq-túlik taýarlarynyń baǵasy 9,2 paıyz, azyq-túlikke jatpaıtyn taýarlar 5,2 paıyz, aqyly qyzmetter 1,4 paıyz deńgeıge ósti. Eń joǵary kúnkóris mınımýmy burynǵysha Mańǵystaý oblysynda - 35,4 myń teńgelik deńgeıde. Bul búkil el boıynsha ortasha deńgeıden 18 paıyzǵa joǵary kórsetkish», - delingen zertteý qorytyndysynda.
Kónkóris mınımýmynyń mólsheri boıynsha úzdik úshtikti Nur-Sultan qalasy (33,5 myń tg) men Almaty (33,1 myń tg) túıindeıdi. Úzdik bestik sapynda sonymen qatar Almaty (30,7 myń) men Túrkistan (30,3 myń) oblystary tur. Jalpy elde alty óńirde kúnkóris mınımýmynyń mólsheri ortasha respýblıkalyq deńgeıden joǵary.
Al kúnkóris mınımýmynyń tómengi deńgeıi Pavlodar (26,3 myń tg), Batys Qazaqstan (26,9 myń tg) jáne Aqtóbe (27,2 myń tg) oblystarynda baıqalady.
