Qazaqstanda kúnine qansha náreste ómirge keledi
ASTANA. QazAqparat - Jedel aqparatqa sáıkes, 2016 jyly Qazaqstanda sábıler ólim-jitimi 11,6 paıyzǵa, ıaǵnı 2015 jyly 1000 tiri týylǵanǵa shaqqanda 9,6-dan 2016 jyly 8,6-ǵa deıin tómendedi. Bul málimetterdi Densaýlyq saqtaý jáne áleýmettik damý mınıstrligi taratty, dep habarlaıdy QazAqparat.
Kóp jaǵdaıda sábı ólimine perınataldyq kezeńniń asqynýy sebep bolady. Sonymen birge, 1 jasqa deıingi balalar damýynyń týabitti aqaýlary, tynys alý jáne qan aınalym organdarynyń syrqattanýy sebepti de qaıtys bolady.
«Respýblıkada kún saıyn 1 myńnan astam, jyl saıyn 400 myńnan asa sábı dúnıege keledi. Týý kórsetkishi sońǵy 5 jylda 3 paızyǵa ósti. Elimizde náreste ólimin azaıtýǵa baǵyttalǵan sharalardyń nátıjesinde salmaǵy 500 gramm jáne odan asatyn shala týǵan balalar ómir súrýge múmkindik aldy. 5 jylda salmaǵy 1500 grammǵa deıingi sanattaǵy balalardyń tirshilikke qabilettiligi 30 paıyzǵa ósip, 60 paıyzǵa jýyq kórsetkishti qurap otyr»,-delingen vedomstvo derekterinde.
Atap aıtqanda, perınataldy kómek kórsetýde biregeı tásilderdi qoldanýdy qamtamasyz etý maqsatynda 300-den astam emhanalyq hattamalar halyqaralyq standarttarǵa sáıkestendirilip, bekitildi. Sonymen birge, medıtsınalyq qyzmetkerler oqytylyp, medıtsınalyq JOO-da oqý jáne jumys baǵdarlamalary ózgertildi.
Damýdyń týabitti kemistikterin ýaqytyly anyqtaý úshin genetıkalyq jáne ýltradybystyq skrınıng jasalady. Perzenthana deńgeıinde nárestelerdiń estý qabileti kemistikterin anyqtaý boıynsha skrınıng engizilgen.
