Qazaqstanda kúnine 150 adam qan tapsyrady

ASTANA. QazAqparat - Qazaqstandaǵy donorlardyń 95 paıyzy qandy erikti túrde qaıtarymsyz tapsyrady. Bul týraly búgin OKQ-da ótken baspasóz máslıhaty barysynda Astanadaǵy Transfýzıologııa ǵylymı-zertteý ortalyǵy dırektorynyń orynbasary Shaıjamal Musabekova málim etti, dep habarlaıdy «QazAqparat» HAA tilshisi.

«Eki sekýnd ótken saıyn álemde bir adam qan quıýǵa muqtaj bolyp otyrady. Sondyqtan, bizge qan ótkizýge kelgen adamdardyń sanyna qaraı muqtaj adamdarǵa qan komponetterin jetkizemiz. Álbette, sońǵy ýaqytta qaıtarymsyz qan ótkizýshilerdiń sany artyp kele jatqanyn atap ótýge bolady. Ótken ǵasyrdyń toqsanynshy jyldary aqyly qan ótkizýshiler kóbeıip ketse, qazirgi tańda Qazaqstanda qan ótkizýshilerdiń 95 paıyzy qaıtarymsyz ótkizedi. Bul qýantarlyq jaǵdaı. Osy kórsetkishti saqtap qalý úshin bizdiń mamandar BAQ, áleýmettik jeliler, aktsııalar men qan ótkizý sharalary arqyly aýqymdy túrde túsindirme jumystaryn júrgizip keledi», - deıdi ol.

Shaıjamal Musabekovanyń sózine qaraǵanda, Qazaqstanda kúnine 150 donor qan ótkizedi.

«Donorlar qan ótkizgennen keıin eki kún jumystan bosatý týraly anyqtama jáne energııalyq qýatyn qalpyna keltirý úshin eń tómengi kúnkóris deńgeıiniń 0,25 paıyzyndaı aqsha túrinde memlekettik kepildendirý alady. Bul 600 teńge ǵana. Dese de, álemdik tájirıbede qaıtarymsyz donorlyq úshin eshqandaı aqsha tólenbeıdi», - dedi ol.

Ortalyq ókili aıtyp ótkendeı, donorlar neǵurlym kóp kelgen saıyn alynatyn qan komponentteri soǵurlym qaýipsiz bola túsedi

«Biz donorlar bir ret kelip qaıtyp ketpeıtindeı jumys júrgizýge tyrysamyz. Aıta keterligi, qazirgi ýaqytta jastar qan ótkizýge kóptep den qoıyp keledi. Eger áleýmettik jelide qannyń shuǵyl kerektigin estip qalyp jatsa, jastarymyz birden qan ótkizýge ázir turady. Biraq, bizge anaǵurlym kóp mólsherde qannyń qajettiligi joq ekenin atap ótkimiz keledi. Biz tek ótinim boıynsha jumys atqaramyz. Sebebi, árbir qan komponentiniń jaramdylyq merzimi bar», - dep túıdi Shaıjamal Musabekova.