Qazaqstanda kúnine 1 mln maska óndirý kózdelip otyr
NUR-SULTAN. QazAqparat – Premer-mınıstrdiń orynbasary Eraly Toǵjanov medıtsınalyq maska máselesi Úkimettiń turaqty baqylaýynda ekenin málim etti, dep habarlaıdy QazAqparat tilshisi.
«Búgingi kúnde Qazaqstanda 365 myń maska shyǵarylady. Aldaǵy kúnderi óndiris kólemin kúnine 1 mln danaǵa deıin jetkizýdi naqty maqsat etip qoıdyq. Oǵan jetkizemiz de», - dedi Eraly Toǵjanov Úkimettiń baspasóz ortalyǵynda ótken onlaın rejimdegi brıfıng barysynda.
Osylaı deı kele Eraly Toǵjanov kóneden kele jatqan «úsh synaq» ósıetin eske aldy.
«Qurmetti otandastar, búgingi áleýmettik-ekonomıkalyq jaǵdaı barsha memleketter úshin úlken syn saǵaty bolyp otyrǵany belgili. Ótken babalarymyzdan qalǵan úsh synaq qaǵıdasy bar: baq synaǵy, qıynshylyq synaǵy, ólim synaǵy degen. Búgingi jaǵdaı adam balasyna ǵana emes, memleketimizge, táýelsizdigimizge túsken synaq bolyp otyr. Ultymyz óz tarıhynda bul sııaqty synaqtardan qanshama ret aýyzbirshiliktiń arqasynda ótken, adamgershilik arqasynda halyq bolyp jabyla kótergen. Búgingi urpaq ta birlese jumyla otyryp, ortaq sheshimderimizdiń arqasynda barlyq máselelerdi eńseretinimizge tolyqtaı senemiz», - dedi vıtse-premer.
